Epos

Aanbieders

TERUG NA AANBIEDERS

Lise Roberts

  • RSG Landbou 21 Maart 2019
    Donderdag 21 Maart 2019

    Waarom het ons beestelersgenootskappe nodig? Dr Japie van der Westhuizen van SA Stamboek beantwoord hierdie vraag in RSG Landbou. Dan het die JSE onlangs die Wagyu-beestelersgenootskap genader oor beleggingsmoontlikhede in die vinnig groeiende vleismark. Dr Michael Bradfield vertel meer hieroor. Graan SA en sy lede staar vanjaar heelwat uitdagings in die gesig. Een daarvan is hulpverlening aan klein asook kommersiële graanboere, veral met die oog op die droogte. Dr Dirk Strydom van Graan SA vertel wat tydens hulle jaarlikse kongres hieroor besluit is.

  • RSG Landbou 20 Maart 2019
    Woensdag 20 Maart 2019

    Sommige skaapboere skram weg van kruipvoeding. Volgens Raché Stofberg, ’n voedingkundige by Wesfed Voere in Moorreesburg, hou dit egter heelwat finansiële voordele in. ‘n Staatsveearts, dr Alicia Cloete, vertel hoe ‘n boer aan die soönotiese siekte, brusellose, oorlede is en hoe dit voorkom kan word. Christopher Sparks, ‘n veeboer van die Swinburne-omgewing, gesels oor sy boerderypraktyke nadat hy as Suid-Afrikaanse stoetteler en nasionale vleisbeesteler aangewys is. En Francois la Grange van Hinterland praat oor die omvang van pluimveeboerdery in Suid-Afrika.

  • RSG Landbou 19 Maart 2019
    Dinsdag 19 Maart 2019

    Om R530 per kilogram vir sybokhaar te kry, wil gedoen wees! Lise Roberts gesels met Willem Wagener van die Willowmore-omgewing oor sy sybokke, en die rekordprys wat hy onlangs behaal het. Daar is ook inligting oor die rol wat data-insameling in die landbou-omgewing speel. Hennie Maas praat met Marion Delport van die Buro vir Voedsel- en Landboubeleid, oor die rol van sogenaamde groot data. Daar is ook ’n gesprek met dr. Carel Muller van die Universiteit van Stellenbosch oor hoogsproduserende koeie in ‘n melkkudde. En dan is Yolandé Roodt oudergewoonte op haar pos met die jongste wolpryse.

  • RSG Landbou 18 Maart 2019
    Maandag 18 Maart 2019

    Hennie Maas praat met Emmanuel Nel van die Kwandwe-wildsplaas in die Oos-Kaap. Hy vertel meer oor die plaas en hulle wildveiling wat die einde van die maand plaasvind. Daar is ook ‘n gesprek met Jahni de Villiers van Agri SA oor landbou se reaksie op die inwerkingtreding van die minimumloon. En Lise Roberts gesels met Ken Coetzee oor uitheemse kaktusse wat weidings en veld in Suid-Afrika negatief beïnvloed.

  • RSG Landbou 14 Maart 2019
    Donderdag 14 Maart 2019

    Water is lewensbelangrik vir enige plaas, en die droogte van die afgelope paar jaar het ons weer intens bewus gemaak hiervan. Geoloog Jordaan Fouché praat oor grondwater en wat ons alles daaroor moet weet. Daar is ook ‘n gesprek met Alex Wehmeyer, die hoof van die Morgenzon Landbou-akademie, wat verlede jaar by Alfa as FNB Landbouskool van die Jaar gekroon is. En ons verteenwoordiger in die Noord-Kaap, Koos du Pisanie, het in Kakamas se wêreld met ’n plaaskoorleier gesels oor hulle musiekkuns.

  • RSG Landbou 13 Maart 2019
    Woensdag 13 Maart 2019

    OVK vier vanjaar sy honderdste bestaansjaar. Die landboumaatskappy se besturende direkteur, Stefan Oberholzer, vertel hoe OVK ontstaan het. Oormatig bespierde beeste in ‘n kudde het voor- en nadele. Dr. Helena Theron van SA Stamboek gesels oor dié interessante onderwerp. Een van die hoogtepunte op die Suid-Afrikaanse landboukalender, is die jaarlikse Bloemskou. Elmarie Prinsloo vertel waarna besoekers vanjaar kan uitsien.

  • RSG Landbou 12 Maart 2019
    Dinsdag 12 Maart 2019

    Hoe maak ‘n boer as hy in 2011 laas noemenswaardige reën gehad het? RSG Landbou se verteenwoordiger in die Noord-Kaap, Koos du Pisanie, het in die Kenhardt-distrik met André Nel en sy vrou Marinda gesels oor uithou-boer in die Boesmanland. Dr. Althea Grundlingh van die Landbounavorsingsraad praat oor die belangrikheid van vleilande, en wat Suid-Afrika se vleilandstatus tans is. Lise Roberts praat ook met Johan Ehlers van Agri-Expo oor vanjaar se SA Kaasfees wat by Sandringham naby Stellenbosch plaasvind, en Yolandé Roodt staan gereed met die wolmarkverslag.

  • RSG Landbou 11 Maart 2019
    Maandag 11 Maart 2019

    Ons verteenwoordiger in die Noord-Kaap, Koos du Pisanie, praat met Dawie Klopper van PSG oor die toekoms van landbou, wat volgens Dawie positief is. Lise Roberts gesels met Christo Bester van die LWO Werkgewersorganisasie oor hoe wangedrag in die werksplek hanteer moet word. En daar is ‘n bydrae deur Petrus van Heerden van Beeswinkel oor die tegnologie wat ingespan word om die waardeketting van beesvleisproduksie korter en meer doeltreffend te maak.

  • RSG Landbou 7 Maart 2019
    Donderdag 7 Maart 2019

    Die Melkprodusente-organisasie se Grootkudde-konferensie is ‘n hoogtepunt op melkboere se kalender. Hennie Maas gesels met Philip Swart van die organisasie oor die geleentheid wat vanjaar in Port Elizabeth plaasvind. Daar is ook ‘n gesprek met Thea van Zyl oor die Agri’s Got Talent-kompetisie wat jaarliks onder plaaswerkers plaasvind en al eho groter belangstelling lok. En Dirk Coetzee van AGT Foods Africa praat oor die dormansie-klassifikasie van lusernkultivars.

  • RSG Landbou 6 Maart 2019
    Woensdag 6 Maart 2019

    Satelliettegnologie sal in die toekoms ‘n baie belangrike rol in die landbou speel. Hennie Maas praat met dr. Japie van Zyl van Hydrosat in Kalifornië oor ‘n nuwe stel satelliete wat elke twee of drie dae waarnemings van die aarde sal doen, en veral belangrike werk vir die landbou sal doen. Daar is ook ‘n gesprek met prof. Michiel Scholtz van die Landbounavorsingsraad oor die debat oor landbou se aandeel in die koolstof- en watervoetspoor. Lise Roberts praat met Francois Strydom van Senwes oor die status van sojabone in die land, en dr. Michael Bradfield van die plaaslike Wagyu-genootskap gesels oor ’n ooreenkoms met Morgan Beef.