EposTwitter

Aanbieders

Haidee Muller

Haidee Muller
Biografie

Haidee Muller is op die volstruisdorp Oudtshoorn gebore. “Maak nie saak hoe lank gelede nie,” grinnik sy. Na 10 jaar as joernalis by Huisgenoot het dié borrelende plattelander nou uiteindelik haar nis gevind – RADIOWERK. Deesdae is sy deel van die Oggend op RSG-span saam met Martelize Brink en Johan Rademan. Sy vervaardig ook buitelug-insetsels vir die program en timmer so nou en dan ook dokumentêre programme vir die stasie aanmekaar.

"Ek geniet elke liewe oomblik as ek die dag in die ateljee saam met of Brink of Rademan uitsaai. Met goeie leermeesters soos hulle, wat meer kan ‘n mens dan nou vra?”

Haidee het ’n BA-graad in politiek en sielkunde aan Rhodes Universiteit behaal. Bewapen met ’n nuttelose (soos sy dit noem) graad, het sy as sekretaresse (wat nie kon tik nie!) by die YOU tydskrif begin werk. Daarvandaan het sy fluks gevorder en na Huisgenoot se advertensieafdeling as advertensieklerk beweeg. In 2001 het haar drome gestalte begin kry – sy ontvang ‘n Media24-beurs en behaal in 2002 haar Bphil-graad in joernalistiek aan die Universiteit Stellenbosch. Hierna doen sy 'n internskap by Huisgenoot en die res is geskiedenis. Sedert 2003 het sy daar as joernalis gewerk tot sy haar in Mei 2013 permanent by die RSG-familie aangesluit het.

Sy is 'n pretmeisie, lief vir uiteet (hoewel sy gedurig oor vetword kla), dol oor resepteboeke (hoewel sy nooit een kan volg nie) en is vreeslik trots op haar baie groot musiekversameling. Haidee het ook al ‘n paar keer gesig gewys op die kassie – op die vermaakprogram 10 uit 10 op kykNET en ook as een van Huisgenoot se beoordelaars in die werklikheidsprogram Saktyd in 2011.

"Om my heeltyds op radiowerk toe te spits, was voorwaar die BESTE besluit van my hele lewe. Ek sal seker nie ophou skryf nie, maar om ‘n storie met klank in te kleur, is vir my die beste-este ding in die wêreld.’’