Nuus

SOEK

Datums
calendar calendar

20 April 2019

RSG saai elke dag tot soveel as 18 nuusbulletins uit. Klik op die betrokke uur hieronder om daardie spesifieke bulletin te lees.
  • President Cyril Ramaphosa waarsku dat hy sal optree teen amptenare wat versuim om dienste aan die publiek te lewer. Ramaphosa het beswaarde inwoners van Ekuvukeni by Ladysmith in KwaZulu-Natal toegespreek waar gewelddadige diensleweringsbetogings voorkom. Die protesoptrede het onder meer daartoe gelei dat kinders die afgelope paar maande reeds nie skool toe gaan. Ramaphosa het onderneem om 'n taakspan na die gebied te stuur om toe te sien dat die gemeenskap se klagtes aandag ontvang. Hy het gesê mense wat nie hul plig nakom nie, kan selfs uit hul poste verwyder word.

  • Die Suid-Afrikaanse Weerdiens waarsku dat swaar reën oor KwaZulu-Natal van vanaand af tot oorstromings in die provinsie kan lei. 'n Voorspeller van die weerdiens, Stacey Colborne, sê 'n 60-persent kans bestaan vir hewige donderstorms oor veral die noorde en noordooste van die provinsie. Colborne sê die donderstorms kan volgens aanduidings tot Dinsdag duur.

  • Andrew Randall, die fietsryer wat gister in 'n tref-en-trap-ongeluk in Centurion doodgery is, se vrou het 'n beroep gedoen op die bestuurder van die wit Toyota Tazz wat van die toneel af gevlug het om hom aan die polisie oor te gee. Randall is op die toneel dood en nog twee fietsryers is beseer toe die motoris op die R-55 in 'n groep fietsryers ingejaag het. 'n Emosionele Tracy Randall vra dat die motoris wat haar twee kinders se pa doodgery het, aan die man gebring word

  • Die departement van Gemeenskapsveiligheid in Mpumalanga sê die meeste van die voertuigbotsings sover die Paasnaweek op die provinsie se paaie is te wyte aan ongeduldige bestuurders en waarskynlik ook moeë bestuurders. Elf mense het die naweek in Mpumalanga omgekom in die bykans dertig botsings sedert die begin van die langnaweek. Die departement se woordvoerder, Moeti Mmusi, sê die meeste van die ongelukke was tromp-op botsings. Mmusi het motoriste gemaan om nie ander voertuie oor sperstrepe verby te steek nie en om stadiger te ry in ongunstige weersomstighede.

  • Vier mans is by twee huise in Plumstead in die Kaapse Skiereiland in hegtenis geneem nadat groot hoeveelhede dwelms en 'n ongelisensieerde vuurwapen en ammunisie in hulle besit gevind is. Die polisie se teenbende-eenheid het 'n wenk ontvang oor onwettige bedrywighede in die gebied. Die woordvoerder van die polisie, Novella Potelwa, sê die verdagtes sal Dinsdag in die hof verskyn.

  • Huldeblyke stroom in vir die 29-jarige Lyra McKee, 'n bekroonde joernalis wat gister in Derry in Noord-Ierland doodgeskiet is. McKee was in 'n groep mense wat gekyk het hoe jeugdige Ierse Nasionaliste die polisie ná 'n klopjag aangeval het. Die jeugdiges het petrolbomme na die polisie geslinger en motors aan die brand gesteek. McKee is raakgeskiet toe 'n man op polisielede losgebrand het. Twee jeugdiges van 18 en 19 jaar oud is intussen in hegtenis geneem op aanklagte van terrorisme en moord. Een van die huldeblyke kom van oudpresident Bill Clinton van Amerika. Clinton sê McKee se dood is 'n herinnering van wat alles op die spel is indien Noord-Ierland nie die afgelope 21 jaar se vrede en vooruitgang handhaaf nie.

  • SUPERRUGBY... Die Stormers het hul wedstryd teen die Brumbies in Kaapstad met 17-19 verloor. Die Brumbies het teen rustyd met 12-10 voorgeloop. Vroeër het die Highlanders die Blues in Dunedin met 24-12 geklop, terwyl die Waratahs die Rebels in Sydney met 23-20 getroef het.

  • TENNIS:: In Monaco sal twee minder bekende spelers môre sake om die titel van die Monte Carlo Meesterstoernooi uitspook. Dit volg nadat die 13de gekeurde Italianer, Fabio Fognini, vanmiddag die wêreld se Koning van Klei, die tweedegekeurde Rafael Nadal van Spanje, 'n rukkie gelede in die tweede halfeindrondewedstryd van die dag uitgeskakel het. Die telling was 6-4 en 6-2. Fognini kom teen die 48ste-gekeurde Serwiër, Dusan Lajovic, te staan nadat hy vroeër sy plek in die einstryd bespreek het. Lajovic het in die eerste halfeindstryd van vandag met die tiendegekeurde Rus, Daniil Medvedev, afgereken met 7-5 en 6-1.