Ryk van Niekerk gesels met Adriaan Rootman, die eienaar van Luxury Time. Hulle verkoop outentieke tweedehandse horlosies van vooraanstaande handelsmerke soos Rolex, Omega en Cartier.

Regie: Denver Vraagom
EPISODE 35: Dominee Malan vra of hy Albert se aandeel in die galery kan koop. Manie loop in Marita langs die swembad vas by die gastehuis waar sy bostukloos langs die swembad sonbak, en word uit die veld geslaan. Marita en Albert mediteer langs die swembad om te besin of hulle gaan aanbly of vertrek.

Jou verhouding met jou ouers kan ingewikkeld wees as ‘n tiener of jong volwassene. Hazel Janse van Rensburg gesels met haar ma, Eda Janse van Rensburg, en ouma, Hazel van Vuuren, oor hulle verhouding, en hoe verskillende generasies dit benader.

Nataniël vertel van die produksie, Ring van vuur, wat te sien is by die Suidoosterfees in Kaapstad. Onbegeleide sang deur ‘n klein groep sangers, ook bekend as a capella, is amper so oud soos musiek self. Dit is later verfyn, veral tydens die Renaissance- en Barokperiode, tot ‘n gespesialiseerde sangsoort. Terrance April gesels met die leier van die Boulevard Harmonists, Kobus Venter. Coenie Visser, feesdirekteur van Classics for All, vertel van die fees wat 20 jaar gelede begin is. Die kunstenaar, Varenka Paschke, gesels oor haar solo-uitstalling waarin sy vrouwees vier. Dis te sien by die Breytenbach-galery in Wellington.

Daniel Hugo gesels oor ’n argitek van Kaapstad, Martin Kruger, se debuutbundel, Gekaapte Stad. Kruger het al die wêreld platgereis, en hy dig oor van die grootste en mees bekende stede, maar ook oor sy eie tuisstad se bekoring.

Nic de Jager lees twee verhale van Cas Wepener en Hennie van Deventer voor. Cas het dit oor ‘n plaasromanse en begraafplaas, en ons hou kameelsensus saam met Hennie.

Johan van Lill praat met geestesgesondheidspraktisyn Jacques Botes oor die impak wat eensaamheid op jou geestesgesonheid het.

Die gebruik van groeibevorderaars in voerkrale lê dr. Shaun Morris van Octavoscene baie na aan die hart weens die wanpersepsies wat hieroor heers. Hy gesels oor die feite. Agricol se gewilde Groendag is om die draai, en Joubert Swanepoel het meer inligting. Jaco Taute van die Rooivleisprodusente-organisasie in Gauteng gee terugvoer oor hulle kongres wat verlede week in Pretoria gehou is.

Met kanker in die gesig wat toeneem, moet al meer rekonstruksie-chirurgie gedoen word om die kake, tong, lippe, neus en ander dele van die gesig, waar die kanker weggesny moes word, weer op te bou. Het jy geweet dat kakebene opgebou word uit een van die onderbene? Of dat elke deel wat oorgeplant word, se bloedvate met mikrochirurgie aan oorblywende bloedvate in die kop en nek geheg word? Mari Hudson praat met ’n plastiese en rekonstruktiewe chirurg wat baie betrokke is by dié opbou-chirurgie.

AS DIE HADIDA ROEP deur Charles J. Fourie
Regie: Denver Vraagom
EPISODE 36: Wilma keer terug van Kaapstad af, waar sy dominee Malan gaan aankla het by die kerkraad. Albert en Marita besluit om nog ‘n ruk lank aan te bly, en word deur Wilma vir ete genooi by Ronel se restaurant. Ester sit ‘n goeie woord in vir Albert by Ronel, en vra haar om haar pa met sy nuwe meisie te aanvaar.

Die piesangdiewe.

Wat is te veel, te vinnig in ‘n verhouding? Barrie Ferreira besoek kliniese sielkundige Franchele Heiberg by haar praktyk om beter te verstaan wat in ‘n mens se brein gebeur wanneer jy verlief raak op iemand. Hy hoor ook by jongmense wat hulle dink waar om die streep te trek in ‘n nuwe verhouding.

Ilse Salzwedel gesels met Irma Venter oor AL WAT TEL. Rachelle Greeff vertel meer oor haar biografie van Phoebe Gerwel, PHOEBE: ‘N LEWE SAAM MET JAKES GERWEL. Johan Myburg vertel van die nuwe Latyns-Amerikaanse letterkundige oplewing wat gelei word deur vroueskrywers, Salman Rushdie se outobiografie KNIFE: MEDITATIONS AFTER AN ATTEMPTED MURDER, en stel ons voor aan die Australiese misdaadskrywer Garry Disher. Die name van die literêre pryswenners van die Suid-Afrikaanse Akademie vir Wetenskap en Kuns word ook aangekondig. Dit sluit die Hertzogprys in.