18:00 - 18:10

Nuus & Weer

Nou op die lug: 18:10 - 19:00

RSG Geldsake met Moneyweb

Met Ryk van Niekerk

Ryk van Niekerk

Volgende: 19:00 - 19:05

Nuus

19:05 - 19:15

Aandboekvoorlesing

Tuis | Potgooi | Potgooi Resultaat
  • Program

Skrywers en boeke 1 November 2023

1 November 2023

Sussie Kotze het onlangs haar 90e verjaarsdag gevier. Sy vertel vir Ilse Salzwedel van die inspirasie agter haar roman wat vroeër vanjaar verskyn het, en gesels oor haar lewe en werk. Joan Hambidge gesels oor vier Afrikaanse boeke wat haar vanjaar beïndruk het. Johan Myburg het nuus oor twee goed wat hoofopskrifte gehaal het tydens die onlangse Frankfurtse boekeskou: ‘n toekenning aan Salman Rushdie, en ‘n toespraak deur die Sloweense skrywer en intellektueel Slavoj Zizek. Johan vertel ook waarna lesers kan uitsien in Hilary Mantel se outobiografie, A MEMOIR OF MY FORMER SELF: A LIFE IN WRITING. Mantel is verlede jaar oorlede, en hierdie is die laaste boek uit haar pen.


Skrywers en boeke 25 Oktober 2023

25 Oktober 2023

Phyllis Green, SARIE se boekeredakteur, vertel vir Ilse Salzwedel van ‘n klompie nie-fiksieboeke wat sy onlangs gelees het en kan aanbeveel.  Ilse gesels met Fanie Olivier oor sy Afrikaanse vertaling van die Belgiese skrywer Erwin Mortier se GODENSLAAP. Johan Myburg bring hulde aan die Amerikaanse digter en voormalige Nobelpryswenner, Louise Glück, ná haar onlangse dood. Hy gesels ook oor ʼn nuwe bundel kortverhale uit die pen van Jhumpa Lahiri, en ‘n Duitse literêre organisasie se besluit om ‘n letterkundeprys wat tydens die Frankfurtse boekeskou oorhandig sou word aan Adania Shibli, ‘n skrywer van Palestynse afkoms, onbepaald terug te hou. Haar roman, MINOR DETAIL, het reeds in 2020 verskyn en wêreldwyd groot lof ingeoes.


Skrywers en boeke 18 Oktober 2023

18 Oktober 2023

Ilse Salzwedel gesels met vier skrywers tydens ‘n spesiale opname by die Toyota US Woordfees. Johann Rossouw vertel van die inspirasie vir sy nuwe roman, SLUITSTUK, en gesels ook oor VERNIETIG, sy vertaling van ‘n roman deur die Franse skrywer, Michelle Houellebecq. Beryl Botman vertel meer oor haar twee outobiografiese boeke, SEDERT DIE DOOD ONS SKEI en STEEDS BLY DIE LIEFDE. Rina Bester, wat die wenverhaal geskryf het vir die nuwe Woordfeesbundel, gesels oor die inspirasie vir haar verhaal. Ian Sutherland, skrywer van CATASTROPHE, vertel van die navorsing vir sy roman. Hy het onder andere gaan kyk het hoe lyk dit by Tjernobiel, waar ‘n kernkragramp in 1986 plaasgevind het.


Skrywers en boeke 11 Oktober 2023

11 Oktober 2023

Phyllis Green, SARIE se boekeredakteur, gesels oor ‘n Afrikaanse boeke wat sy kan aanbeveel, soos Marita van der Vyver (LAASTE KANS), Madelein Rust (SIEMBAMBA) en Nicole Jaekel Strauss (DEELFONTEIN) se nuwe romans, en Marco van der Colf se debuutroman (DIEPER DROME). Ons kondig die wenner aan van die Stellenbosch Woordfees se kortverhaalbundelwedstryd. In sy internasionale bydrae vertel Johan Myburg meer oor die wenner van vanjaar se Nobelprys vir letterkunde, nuwe internasionale boeke vir jou leeslys, en ‘n splinternuwe Engelse vertaling van Homeros se klassieke werk, The Iliad.


Skrywers en boeke 4 Oktober 2023

4 Oktober 2023

Ilse Salzwedel gesels met Julio Agrella, skepper van die Zeus van Wyngaardt-misdaadfiksiereeks. Daar is  meer oor die wenners van die ATKV Woordveertjies en die kykNET-Rapportboekpryse. In sy internasionale bydrae vertel Johan Myburg meer oor voorspellings oor wie vanjaar aangewys sal word as die wenner van die Nobelprys vir letterkunde. Hy het ook nuus oor die  kortlys van die Bookerprys en die fiksiekortlys vir vanjaar se Sunday Times-letterkundeprys. Johan stel ons ook voor aan Naomi Wood, die Engelse skrywer wat onlangs aangewys is as die wenner van die 2023 BBC-kortverhaalwedstryd, en hy bring hulde aan die Britse digter en skrywer, Tobias Hill, wat onlangs oorlede is.


Skrywers en boeke 27 September 2023

27 September 2023

Ilse Salzwedel gesels met SJ Naude, tweemalige Hertzogpryswenner, oor sy jongste roman VAN VADERS EN VLUGTELINGE. In die tweede gedeelte van die program kan jy luister na ‘n hoorbeeld wat in 1993 deur Chris Swanepoel saamgestel is om die sestigste herdenking van Ingrid Jonker se geboortedag te vier. Daarin gesels die digter self oor haar lewe, en jy kan ook die stemme hoor van verskeie bekende Sestigers, onder andere wyle Jan Rabie en Andre P. Brink. Jonker is op 19 September 1933 gebore.


Skrywers en boeke 20 September 2023

20 September 2023

Schalk Schoombie was ‘n bekroonde akteur, dramaturg, joernalis en skrywer. Ilse Salzwedel onthou hom met ‘n argiefonderhoud uit 2015. Elize Parker gesels oor haar jongste roman, WANNEER SKADUWEES KANTEL. In Johan Myburg se internasionale insetsel het hy nuus oor die veranderings aan die Pulitzerpryse se reglemente, en twee boeke wat benoem is vir die Bookerprys (Chetna Maroo se WESTERN LANE en Ayobami Adebayo se A SPELL OF GOOD THINGS). Jy kan ook meer uitvind oor Michael Ondaatje, wat onlangs 80 geword het, se werk.


Skrywers en boeke 13 September 2023

13 September 2023

Pieter Stoffberg is die skrywer van TENK, RSG se nuwe laataandboekvoorlesing. Hy vertel van die storie agter hierdie oorlogsroman. Ilse Salzwedel bring hulde aan Gerrit Olivier, bekende musikus, akademikus en skrywer met ‘n argiefgesprek oor sy bundel biografiese sketse KERSFEES OP WONDERFONTEIN. Johan Myburg vertel meer oor Edith Grossman, bekende Amerikaanse vertaler van o.a. LOVE IN THE TIME OF CHOLERA, die kortlys vir die bekende Kirkus-letterkundeprys en Sarah Holland-Batt, ‘n digter van Australië, wat pas ‘n tweede prys ontvang het vir haar derde digbundel, THE JAGUAR.


Skrywers en boeke 6 September 2023

6 September 2023

Ilse Salzwedel gesels met Eunice Visser, skrywer van DIE KAAPSE SLAWE: 1652-1838, wat pas deur die SA Akademie vir Wetenskap en Kuns met die LW Hiemstraprys bekroon is. Rudie van Rensburg gesels oor sy nuwe Kassie Kasselman-roman, DWELM, en die rolprentweergawe van HANS STEEK DIE RUBICON oor. Johan Myburg stel ons voor aan die Roemeens-Duitse skrywer en digter Herta Müller en die Maleisiese skrywer Tan Twang Eng. Hy vertel meer oor nuwe boeke wat vandeesmaand oorsee verskyn.


Skrywers en boeke 30 Augustus 2023

30 Augustus 2023

Ilse Salzwedel gesels met Eben Venter oor sy jongste boek, DECIMA, waarin ‘n swartrenosterkoei een van die hoofkarakters is. Ons hoor watter skrywers vir vanjaar se ATKV-Woordveertjietoekennings benoem is. Johan Myburg het ‘n hele klomp interessante nuus uit die internasionale letterkundige wêreld, van  kunsmatige intelligensie en die splinternuwe probleme wat dit vir skrywers veroorsaak, tot hoe die Amerikaanse liedjieskrywer-sanger Taylor Swift se lirieke letterkundiges oorsee op hol het.


POTGOOI (aanddiens)

INTERAKTIEF

Volg ons op sosiale media: