18:00 - 18:10

Nuus & Weer

Nou op die lug: 18:10 - 19:00

RSG Geldsake met Moneyweb

Met Ryk van Niekerk

Ryk van Niekerk

Volgende: 19:00 - 19:05

Nuus

19:05 - 19:15

Aandboekvoorlesing

Tuis | Potgooi | Potgooi Resultaat
  • Program

1 Aug 2012

1 Augustus 2012

Daar is nuus oor die Booker-prys langlys waarop André P. Brink se nuwe roman, Philida, is. Daar is ‘n kort bespreking van vier nuwe Afrikaanse ligte romans met Christelle Webb-Joubert. Daar’s ‘n onderhoud met Leti Kleyn, medesamesteller van ‘n nuwe Afrikaans skryfgids en handleiding vir voornemede skrywers. Terrance April vertel meer oor die digter Kelvin Sole. Willie Burger praat in sy gereelde rubriek oor aspekte van die roman oor die proloog. Joan Hambidge gesels met Carina Stander oor haar debuutroman, Wildvreemd.


25 Jul 2012

25 Julie 2012

‘n Paar romans waarin die Olimpiese Spele ‘n rol speel, word bespreek. Daar is ‘n gesprek met PG du Plessis wat die Helgaard Steyn-prys gekry het vir sy roman, Fees van die Ongenooides. Hy gesels oor die vertaling van die boek waaraan hy nou werk en ook waarmee hy hom tans besig hou. Die digter Wopko Jensma sou op 26 Julie 73 jaar oud gewees het en daar word gekyk na sy bydrae tot die Suid-Afrikaanse letterkunde en protesliteratuur. Terrance April het sy gereelde bydrae oor ‘n skrywer uit Afrika – vandag gee hy meer inligting oor die skrywer Veronique Tadjo wat oorspronklik van die Ivoorkus kom. Ten slotte is daar ‘n onderhoud met prof. Andries Oliphant oor die struggle-letterkunde van die jare 70 en 80, veral met betrekking tot die uitgewerye en skrywersverenigings van daardie tyd. Hy praat oor die reg van die skrywer om aanstoot te gee en satiriese bespottings te maak, maar ook oor die verantwoordelikheid van die skrywer om fyn te dink.


18 Jul 2012

18 Julie 2012

Twee groot stemme uit die Afrikaanse en Nederlandse literêre geledere het stil geword – dié van Gerrit Komrij en PH Nortjé. Anke Marais (14jr) van Kaapsche Hoop vertel hoekom sy so baie hou van The Hunger Games, ‘n trilogie van jeugboeke wat al weke op die beste verkooplys is. ‘n Gesprek met Willie Burger oor die literatuur en hoe stories inmekaar steek – hierdie keer oor openingsinne. Terrance April vertel meer oor die skrywer Wole Soyinka. In die laaste gedeelte van die program gesels die bekende letterkundige Joan Hambidge met die skrywer André le Roux. Hy is digter, romanskrywer, rubriekskrywer en ‘n eerlike op-die-man-af-verteller. ‘n Onlangse gedig wat op die internet verskyn het, word ook voorgelees.


11 Jul 2012

11 Julie 2012

Johan Badenhorst, vervaardiger van die Voetspore TV-programme, vertel van sy oudioboek, DRIE REISIGERS EN VALIANT SWART VAT WEER DIE PAD. ‘n Bonus in die program is ‘n voorlesing deur Dana Snyman van een van sy stories wat op die luisterboek verskyn. Joan Hambidge gesels met die bekroonde Nederlandse vertaler, Riet de Jong-Goosens, oor hoe daar besluit word op ‘n vertaling en die probleme waarmee die vertaler worstel. Hulle gesels oor die “valse vriende” tussen Afrikaans en Nederlands, die lesersgehoor in Nederland en die verskillende leessmake van die Afrikaanse en Nederlandse leser. Corina van der Spoel gesels met Riette Zaayman wat hoof is van die argiewe en spesiale versamelings by die biblioteek van die Universiteit van Johannesburg. Sy vertel van besondere boeke in die biblioteek en oor ‘n handgeskrewe manuskrip van die skrywer Eugene Marais wat onlangs aangekoop is vir die spesiale versameling.


4 Jul 2012

4 Julie 2012

Daar is nuus oor wat jy op die Boekefees by die Vryfees in Bloemfontein kan verwag. Marita van der Vyver vertel meer oor watter boeke sy graag lees en die letterkundige Willie Burger vertel hoe stories werk. Terrance April praat oor die skrywer Can Themba. Die skrywer TT Cloete het onlangs 88 jaar oud geword. Hierdie literator, kritikus, digter, dramaturg, prosaskrywer en psalmverwerker is ‘n merkwaardige figuur op die Afrikaanse literêre toneel. Joan Hambidge gesels met hom oor sy gewildheid, die aard van die digkuns en wat hy lees ter inspirasie. Hy lees ook sy gedig ANNA voor.


27 Jun 2012

27 Junie 2012

Corina van der Spoel praat met Wilna Pretorius, sekretaris van die Potchefstroomse leesunie, ‘n leeskring wat reeds 50 jaar bestaan. Die skrywer Marlene van Niekerk se roman AGAAT is in Sweeds vertaal en is reeds vir vyf weke die topverkoper in dié Skadinawiese land. Sy vertel hoekom sy dink die Swede so baie van die boek hou en wat die toekoms vir ernstige Afrikaanse literatuur is. Andries Visasie praat oor die ontvangs in die pers van Johan de Lange se digbundel, DIE ALGEBRA VAN NOOD, waarmee hy die Herzogprys in 2011 gewen het. Die debuutskrywer, André Kruger, praat oor sy eersteling boek DIE TWEE LEWENS VAN DIETER ONDRACEK pas verskyn het.


20 Jun 2012

20 Junie 2012

In Boekenuus word daar gesels oor Internasionale Kortverhaaldag op 20 Junie en om dit te vier is daar ‘n gesprek met Jeanette Ferreira, skrywer en ook samesteller van twee nuwe kortverhaalbundels (Grensoorlogstories en Boere-oorlogstories 2). Daar is Terrance April se gereelde bydrae oor skrywers van Afrika waarin hy meer vertel van die Johannesburgse skrywer Chris van Wyk. Daar is ook ‘n gesprek met die letterkundige Willie Burger oor stories en hoe hulle werk. En dan gesels Joan Hambidge met die digter Louis Esterhuizen oor die Versindaba-webblad, oor wie nog gedigte lees of koop en die vakmanskap van die digkuns. Daar word ook gesels oor sy jongste digbundel, Amper elders.


13 Jun 2012

13 Junie 2012

Daar word gekyk na die belang van die pasgestorwe Amerikaanse wetenskapsfiksie-skrywer, Ray Bradbury, en daar is ‘n gedeelte van die kortverhaal, The Cold Storage Club van Ivan Vladislavic, wat voorgelees word. Corina van der Spoel praat met Otto Liebenberg, die kurator van die Nasionale Afrikaanse Letterkundige Museum en navorsingsentrum (NALN), oor die museum in Bloemfontein en hoe die digitale toekoms vir hulle lyk. Die navorser en letterkundige, Irma du Plessis, vertel van haar ervaring om in die argiewe van NALN te werk.


6 Jun 2012

6 Junie 2012

In Boekenuus kan jy hoor wat die akteur Tobie Cronje lees en daar is nuus oor ‘n boekbind-en herstelkursus by die Taalmuseum in die Paarl. ‘n Bemarker van Exclusive Books gesels oor die Homebru Promosie en hoe dit gaan met Afrikaanse boeke by dié winkelgroep. Joan Hambidge gesels met die literator, digter, vertaler en kortverhaalskrywer Henning Pieterse oor die UP Winterskool en die funksie van skryfskole. Kan ‘n mens iemand leer om te skryf? Daar is ook ‘n nuwe rubriek van kort gesprekke met Willie Burger, letterkundige van die Universiteit van Pretoria, oor stories en die storie agter die storie. In die eerste gesprek word daar gekyk na wat dit is wat fiksie van nie-fiksie onderskei.


POTGOOI (aanddiens)

INTERAKTIEF

Volg ons op sosiale media: