1kg skaap/lam stowevleis (skenkel en ribbetjie verkieslik, waterblomme hou van ‘n stukkie vet)
olie
2 uie, grof gekap
sout en peper
fyn naeltjies
1 koppie witwyn
1 koppie vleis/hoenderaftreksel
1 kg skoongemaakte waterblomme (was die waterblomme net in bietjie skoon soutwater af, en breek die blomme in helfte indien dit groterige blomme is)
4 groot aartappels, geskil en in groterige blokkies gesny
vars suurlemoen
Geur vleis met sout en peper.
Braai die stowevleis in sarsies tot verbruin met olie in potjie.
Verwyder uit die pot en hou eenkant.
Braai uie tot verbruin in potjie.
Skep die vleis terug, geur met ‘n knippie naeltjies en voeg nog sout en peper by indien nodig.
Voeg wyn en aftreksel by en laat prut vir 1½ uur tot die vleis begin sag word.
Sit die waterblomme en aartappels bo-op (moenie die pot roer nie).
Laat prut nog so 45 minute.
Hou die vloeistof dop, die potjie moenie te veel vloeistof bevat nie, maar ook nie droog kook nie. Voeg nog by indien nodig, of haal die deksel af en kook stadig, sodat vloeistof verdamp indien daar te veel vloeistof is.
Druk ‘n lekker vars suurlemoen oor die waterblommetjies uit voor opdiening en bedien met wit rys. Die surigheid gee balans aan die vetterige smaak van die gereg.
Wenke
Sommige mense verkies om ‘n knoffelhuisie by die uie te braai, en voeg koljander by die vleis.
Indien jy toegang tot ‘n vars bossie surings het, kan dit saam met die waterblomme in die pot gevoeg word. Dit kan ‘n groot bos wees, so 2 koppies, indien die stingeltjies grof gekap is.
Indien jy verkies om sonder wyn te kook, voeg meer vleisaftreksel by en die sap van 1 suurlemoen in plaas van die wyn.
Ek het al ‘n vetterige stukkie beesvleis gebruik, maar skaap en lam bly die lekkerste.
* Verpligte velde
Aanbieders
E-nuusbrief
E-nuusbrief
Teken in op die RGS E-nuusbrief
E-nuusbrief
Teken in op die RGS E-nuusbrief
Bel Ons
(011) 714 2702
Navrae
info@rsg.co.za