- Die Afrika-Unie het die Suid-Afrikaanse regter Navi Pillay gelukgewens nadat die Nobelprys vir Vrede aan haar toegeken is. Pillay was aan die hoof van 'n onafhanklike kommissie van die Verenigde Nasies wat verlede jaar bevind het dat Israel volksmoord in die Gasastrook pleeg. Die voorsitter van die Afrika-Unie-kommissie, Mahmoud Ali Youssouf, sê Pillay se loopbaan is 'n blywende nalatenskap vir Afrika en die wêreld. Pillay het teen apartheid geveg en later in die Internasionale Straftribunaal vir Rwanda, die Internasionale Strafhof en die Verenigde Nasies gedien. Youssouf sê Pillay se prestasie is 'n bron van trots vir Afrika-vroue en -meisies, en 'n inspirasie vir toekomstige geslagte.
- Intussen het die Amerikaanse president, Donald Trump, Noorweë gekritiseer omdat die Nobelkomitee nie die Nobelprys vir Vrede aan hom toegeken het nie. Trump verwys dikwels na die vredesooreenkomste wat hy al gesluit het. Volgens hom het die reputasie van Noorweë – waar die komitee gesetel is – skade gely.
- Die weermag is in die middestad van Durban ontplooi. Hulle sal die situasie monitor ná gister se gewelddadige betogings. Die polisie se hulpbronne was gister onder groot druk aangesien woedende betogers oor die stad versprei was. Die betogers het die repatriasie van buitelandse burgers sonder dokumente en die staking van asielaansoeke geëis. Die premier van KwaZulu-Natal, Thami Ntuli, het gister gevra dat die weermag ontplooi word omdat die polisie in die minderheid was. Altesame 22 mense is ná die betogings in hegtenis geneem. Winkels en verskeie ondernemings is vernietig. Hoewel daar vandag geen teken was van die betogings nie, heers 'n gespanne toestand steeds in die stad.
- Wildernis-soek-en-redding in die Wes-Kaap het 'n 20-jarige student van die Universiteit Stellenbosch per helikopter gered nadat hy sowat vier meter ver by die Tweede Waterval in die Jonkershoek-natuurreservaat geval het. 'n Woordvoerder van soek-en-redding, Murray Williams, sê die student het sy vastrapplek op nat rotse verloor terwyl hy na die boonste waterval geklouter het. Hy het saam met vyf metgeselle gestap toe die voorval gebeur het. Die beseerde student is in 'n helikopter gehys en na 'n hospitaal gevlieg vir verdere behandeling.
- Kenia het regeringsvergaderings en -konferensies in hotelle opgeskort nadat die eerste geval van Ebola aangemeld is. Gesondheidsbeamptes sê die stap is deel van pogings om die verspreiding van die virus te bekamp. 'n Keniaanse burger is Maandag dood nadat hy vanuit die Demokratiese Republiek van die Kongo deur Uganda gereis het. Kenia se adjunkminister van gesondheid, Mary Muthoni, sê mense moet kalm bly en net inligting van amptelike gesondheids-kanale vertrou.
- RUGBY:::: Die Bulls het die Lions in die eerste Suid-Afrikaanse derby van die Verenigde Rugby-kampioenskap-seisoen in Pretoria heeltemal oorrompel. Die tuisspan het nege drieë gedruk en met 'n massiewe telling van 57–15 gewen. 'n Kort rukkie gelede het die Stormers met die Sharks in Kaapstad klaargespeel met 'n telling van 37-22.
- KRIEKET::: Dag twee van die eerste toets tussen Suid-Afrika en Australië op Kingsmead in Durban, het aan die besoekers behoort. Nadat die Pofpette hul eerste beurt op 187 vir ses hervat het, is hulle kort ná teetyd vir 390 uitgehaal. Matt Renshaw het 190 lopies gemoker. Suid-Afrika het daarna sy eerste paaltjie in die tweede boulbeurt verloor toe Ryan Rickelton uit is vir 'n nulletjie. Die Proteas was op 27 vir een toe spel weens swak lig gestaak is.
Nuusbulletins
Deel nou
