Waarskuwings oor gure weer in verskeie provinsies het vandag se nuusgebeure oorheers. In die Oos-Kaap moes verskeie bergpasse weens sneeu gesluit word. Sommige is later die dag weer oopgestel.

In die KwaZulu-Natal het die N3-tolkonsessie motoriste gewaarsku oor die gevaarlike, nat paaie, en hulle ook aangeraai om noodvoorraad in hul voertuie te hou. Die konsessie se bedryfshoof, Thania Dhoogra, het motoriste afgeraai om oornag te reis, onder meer weens die risiko dat swartys op die pad kan vorm.

In die Vrystaat het sneeu, reën en ys op die paaie bestuurstoestande moeilik en gevaarlik gemaak. Paaie wat geraak word, sluit die R702 naby De Wetsdorp, die N3 naby Harrismith en die N6 tussen Reddersburg en Smithfield in.

Ander nuus is dat 'n bekende bendeleier vir ondervraging ingeneem in verband met die voorval Vrydagaand in Reigerpark waartydens twee lede van die gespesialiseerde teenbende-eenheid en twee vroue doodgeskiet is. Die polisie het ook twee wapens teruggekry wat aan die beamptes behoort het. Volgens die minister van Polisie, Firoz Cachalia, staan die bendeleier tereg op ses ander aanklagte en was hy uit op parool.

Die Padverkeeroortredingsagentskap, Aarto, gaan in die toekoms boetes vir verkeersoortredings elektronies uitstuur. Dit beteken dat motoriste nie langer kan beweer dat hulle nie aanmanings ontvang het nie omdat dit nie fisiek afgelewer is nie. Aarto het gewaarsku dat ou boetes geldig bly, en dat nie-betaling kan lei tot strafpunte en uiteindelik die opskorting van 'n persoon se rybewys.

Die Gautengse LUR vir Onderwys, Lebogang Maile, sê die provinsie sal sowat 35 miljard rand moet bestee om 200 nuwe skole in die provinsie te bou om die groeiende kapasiteitskrisis in die provinsie te takel. Hy sê oorbevolking in klaskamer is algemeen terwyl die aantal leerlinge in die provinsie toeneem. Die provinsie het jaarliks 'n invloei van tussen 50- en 100-duisend leerlinge van ander provinsies af. Maile sê meer as 500-duisend aansoeke is reeds ontvang sedert aanlynaansoeke om aanstaande jaar se Graad 1 en Graad 8 leerlinge in skole te plaas, verlede week geopen het.

Minstens 111 mense is dood en 87 beseer nadat 'n kragtige aardbewing met 'n seismiese meting van 7-komma-4 die weste van Colombia aan die Stille Oseaan-kus getref het. Volgens die nuwe president wat verlede week ingehuldig is - Abelardo De La Espriella - het meer as 60 geboue ineengestort. In die provinsie Risaralda - 'n koffieverbouingsgebied - het die dodetal tot meer as 40 gestyg. Die episentrum van die aardbewing was in die Chocó-streek tussen die stede Cali en Medellín. Mense is steeds vasgekeer in Cali, waar minstens 30 geboue ineengestort het.

RUGBY: Die Springbok-afrigter, Rassie Erasmus, het die ervare veelsydige voorspeler Deon Fourie by die nasionale groep ingesluit vir die komende reeks teen Nieu-Seeland, nadat hy vir 'n geruime tyd uit aksie was weens 'n besering. Die 39-jarige Fourie, wat beide as losvoorspeler en haker kan speel, sluit môre in Johannesburg by die groep aan. Sy laaste toets vir die Springbokke was in die eindstryd van die Rugbywêreldbeker in 2023 teen Nieu-Seeland in Parys. Fourie het Vrydagaand sy terugkeer tot rugby gemaak in die Stormers se wedstryd teen die All Blacks in Kaapstad.