Dieremaniere

Ons neem jou na die voorste linies in die stryd teen wildsmokkelary, waar slim snuffelhonde en hulle hanteerders ’n onmisbare rol speel. Elsje van Jaarsveld gesels met Lourens Leewner van die Bedreigde Natuurlewe Fonds oor hoe hierdie hoogs opgeleide honde by lughawens en grensposte werk om onwettige produkte soos renosterhoring, ietermagoskubbe, vetplante en reptiele op te spoor, voor dit die land kan verlaat. Hy verduidelik hoe korrekte intelligensie die polisie help om te weet watter vragte om te teiken, en hoe die honde opgelei word om dié items uit te snuffel. Ons kry ook ’n kykie na die unieke band tussen hond en hanteerder, en wat vir die hond voorlê ná sy aftrede.

In hierdie aangrypende episode gesels Elsje van Jaarsveld met Adine Roode, die vrou agter HERD (Hoedspruit Elephant Rehabilitation and Development), Suid-Afrika se eerste toegewyde olifant-weeshuis. Sy neem ons na die olifantkalwers wat sy red, versorg en weer integreer in ‘n olifanttrop om hulle eie saamgestelde gesin te vorm. Hierdie kalfies is wees gelaat weens stroping en konflik tussen mens en dier. Die ouer olifantkoeie wat ook as wesies by die Olifant-weeshuis aangekom het, maak hierdie kalfies groot as hulle eie. Deur stories soos dié van die albino-olifant, Khanyisa, ontdek ons die diep verbintenis, rou en herstel wat hierdie merkwaardige diere ervaar.

Ons leer meer van ’n stokperdjie wat vir almal beskore is – voëlkyk. Of jy nou op jou stoep koffie drink, langs ’n snelweg ry of in die natuur gaan stap, ons geveerde vriende is altyd naby. Professionele voëlkyker Faansie Peacock verduidelik hoe voëlkyk werk, wat die basiese beginsels is en hoe jy daarmee kan begin. Suidelike Afrika is ‘n uiterse ryk voëldiversiteitstreek, met verskillende habitatte en unieke endemiese spesies. Ons hoor ook hoe ’n mens by die groter voëlkykgemeenskap kan aansluit, van projekte en organisasies tot voëlklubs en sosiale media. En natuurlik: hoe jy kinders kan betrek sodat hulle ook ’n waardering vir die natuur en ons kleurvolle diereryk ontwikkel.

’n Resiesperd se loopbaan is dikwels net ’n paar jaar, en baie van hulle tree reeds op drie- of vierjarige ouderdom uit. Tog bly daar nog hope energie, stamina en potensiaal oor vir ’n nuwe lewe. Hierdie perde ondergaan ’n intense heropleidingsproses by die Western Cape Equine Trust. Gewoontes wat vir resies nodig was, moet eers afgeleer word, soos die instink om met die grootste vaart weg te trek, of om altyd teen ander perde te kompeteer. Met geduldige opleiding word hulle geleidelik voorberei vir nuwe rolle as dresseerperde, skouperde, ontspanningsperde, of selfs stoetperde. Elsje van Jaarsveld praat met die span van die Western Cape Equine Trust, ’n organisasie wat al sedert 2005 help om ’n veilige toekoms vir afgetrede volbloed-resiesperde te verseker. Hulle neem die perde in, en met sorg en toewyding, lei hulle die perde weer op en plaas hulle uiteindelik by liefdevolle, deeglik gekeurde eienaars waar die diere kan floreer.

Kan ’n mens werklik met diere kommunikeer? Nie net deur lyftaal en gedrag nie, maar op ’n dieper, intuïtiewe vlak? Lisel Kruger verduidelik hoe sy boodskappe vir diere oor ‘n afstand stuur, en dat hulle terug kommunikeer. Sy kan selfs met diere internasionaal gesels. Bo en behalwe kommunikasie met diere, gebruik sy ook aroma-olie om diere se welstand te ondersteun. Of jy saamstem of skepties is, ons hoor dit uit die perd se bek.

In hierdie aangrypende episode neem ons jou na plekke waar sjimpansees uit die kloue van dierehandel gered word. Saam met Eugene Cussons, stigter van Chimp Eden, hoor ons van lewensgevaarlike reddingsendings, trauma en die stadige pad na herstel van hierdie diere. In samewerking met die Jane Goodall Instituut het hy hoop gebring waar daar byna niks was nie. Sy werk is wêreldwyd bekend danksy ESCAPE TO CHIMP EDEN op Animal Planet, wat die pyn én die wonder van herstel vasgevang het. Dis ’n storie van moed, opoffering en ’n besondere band met dr. Jane Goodall, wat nuwe lewe bring vir hierdie diere aan die suidpunt van Afrika.