Dieremaniere

S2E 20: In die laaste episode van Seisoen 2 reis Elsje van Jaarsveld na die Laeveld vir ’n ontmoeting wat jou hart vinniger sal laat klop. Sy gesels met die merkwaardige Lente Rhoode van die Hoedspruit Bedreigde Spesie Sentrum. Lente deel haar aangrypende lewensverhaal en haar jarelange pad met die rehabilitasie van wilde diere. Ons kry ’n intieme blik op haar unieke grootwordjare, waaronder die storie van ’n jagluiperd wat sy as kind in haar eie ouerhuis grootgemaak het. Lente sluit die reeks af met ’n besonderse, mooi boodskap oor ons diep verbintenis met die natuur. Dit is ’n viering van ’n seisoen vol wonderlike stories, van die sjimpansees in Angola tot die witkruisarende van Johannesburg.

S2E19: Elsje van Jaarsveld neem jou na die hange van die Walter Sisulu Botaniese Tuine in Roodepoort. Sy gesels met Johann van den Berg, ’n passievolle vrywilliger verbonde aan die Black Eagles Project Roodekrans. Johann deel die merkwaardige en unieke verhaal van ’n broeipaar witkruisarende (Black Eagles) wat verkies het om hulle nes te skop te midde van die woelige stadslewe. Jy kry ’n intieme blik op hoe hierdie majestueuse roofvoëls daarin slaag om te oorleef, te jag en suksesvol te broei in ’n stedelike omgewing. Dit is tans broeityd, en die opwinding is groot aangesien ’n nuwe kuiken enige oomblik kan uitbroei. Johann verduidelik wat dit behels om as vrywilliger jou tyd op te offer om hierdie konings van die lug te monitor en beskerm.

S2E18: In hierdie aangrypende en inspirerende episode neem Elsje van Jaarsveld ons agter die skerms van wildrehabilitasie, saam met Wade Whitehead van FreeMe Wildlife. Hy deel die emosionele en logistieke uitdagings wat gepaard gaan met die behandeling en uiteindelike vrylating van beseerde en getraumatiseerde wilde diere. Ons hoor van die dramatiese verhaal van hoe hulle op ’n een slag 4 000 valke moes inneem en versorg nadat die voëls in ’n geweldige haelstorm beseer is. Ons kry ’n unieke blik op die daaglikse sorg van ’n wye verskeidenheid diere wat tans in hulle fasiliteit is – van skilpaaie, tierboskatte, muskeljaatkatte en vaalboskatte tot kraanvoëls, aasvoëls, uile, blesbokke, duikertjies, njalas en ’n zebra. Wade beklemtoon die kragtige netwerk van vrywilligers, veartse en passievolle individue wat nodig is om die suksesvolle rehabilitasie van net een enkele dier moontlik te maak.

S2E17: Elsje van Jaarsveld neem ons na die manjifieke Golden Gate Hoogland Nasionale Park vir ’n ontmoeting met die parkbestuurder, Paddy Gordon. Paddy deel fassinerende staaltjies uit sy merkwaardige loopbaan, waarin hy reeds sewe verskillende nasionale parke onder die vaandel van Sanparke bestuur het. Hy verduidelik wat sy daaglikse werk behels, en beklemtoon die kritieke rol van deurlopende skakeling met plaaslike gemeenskappe om van ’n bewaararea ’n sukses te maak. ’n Hoogtepunt van die gesprek is die nuwe Kgodumodumo Dinosourussentrum, wat sedert sy opening in 2025 reeds 100 000 besoekers verwelkom het. Paddy vertel van die antieke geskiedenis van die gebied, met stories oor die dinosourusse wat 200 miljoen jaar gelede daar geleef het, en hoe hulle uiteindelik uitgesterf het. Die episode word afgerond met ’n dieregeluid-vasvrae oor ’n bekende langnekdier wat selde gehoor word.

S2/E16: Elsje van Jaarsveld neem ons op ’n inspirerende reis na bestemmings waar honde nie net toegelaat word nie, maar as’t ware as familielede geëer en gevier word. Sy gesels Elsje met Karel van der Vyver oor die unieke hondemuseum in Kaapstad, wat die geskiedenis van honde in Suid-Afrika met foto- en beeldhoukuns uitbeeld. Selfs goedgemanierde honde aan leibande is welkom tussen die kunswerke! Daarna verskuif die fokus na die buitelug wanneer Ashley Enslin, eienaar van die bekende Walkhaven Dog Park in Muldersdrift, vertel van hul 22-hektaar paradys langs die Wieg van die Mensdom. Hier kan honde vrylik hardloop, in damme swem en sonder ‘n leiband in die natuur ontspan. Die episode word afgerond met ’n dieregeluid-vasvrae oor die vinnigste soogdier op land.

Elsje van Jaarsveld gesels met Susan Lombard, bestuurshoof van Maroela Media, oor ’n baie spesiale spanlid wat reeds vir tien jaar in die kantoorgange wandel – Japie, die Goue Abbakeur (Golden Retriever). Japie is destyds in die kantoor verwelkom met ’n baie spesifieke doel, om die gemoedere te lig waar joernaliste daagliks met ontstellende stories te doen kry. Susan deel kostelike staaltjies oor Japie se teenwoordigheid, maar die gesprek fokus ook op die praktiese sy van sake soos die verantwoordelikheid van die versorging van ’n kantoorhond en die faktore wat ondernemings in ag moet neem voordat hulle besluit om ’n troeteldier in die werksplek toe te laat.