Intussen

Wilma Paulse is ‘n voormalige joernalis en skrywer van die boek, Blikkies Vol Stories. Sy werk tans as ’n taalversorger, skryf steeds en is betrokke by verskeie Afrikaanse taalgerige boekprojekte in ‘n poging om veral die Oranjerivier-Afrikaans vas te lê. Sy is ‘n lid van die FF’s toe die groep tydens Covid gestig is, en het ook bygedra tot die twee resepteboeke en tydskrif wat deur die groep uitgegee is. Sy is ‘n kranige sjef en hou van die kombuis. Sy dink sy het haar nou amptelik bekwaam as ‘n volwaardige koesister-antie.

Die Afrikaanse radiowêreld neem afskeid van die bekende verwerker, dramaregisseur en voormalige omroeper Eben Cruywagen. Hy het die grootste deel van sy loopbaan by die SAUK deurgebring, en was een van die grondleggers van wat vandag as SABC Opvoedkunde bekend staan. Cruywagen was veral bekend vir sy meesterlike verwerking van klassieke Afrikaanse tekste soos Ampie, Die man van Cirene en Jaffie. As mentor het hy ook talle regisseurs, akteurs en skrywers geïnspireer. Kobus Burger en Ina Strydom bring hulde aan hom.

Pediatriese pulmonoloog dr. Delano Rhoode gee raad oor kinderkwale. Hy praat oor ’n vyjarige wat aanhoudend honger is; ’n tweejarige wat baie sensitief vir harde geluide is; en ‘n driejarige wie ore erg “loop” wanneer hy kongestie het.

Antoinette Pienaar sê ons moet gereeld ons bottel se prop oopdraai.

“Ek kort net ietsie soets.” En voor jy weet, is daar ’n sjokolade, koekie of iets anders binne bereik. Is ’n soettand bloot ’n gewoonte, of kan daardie intense drang na suiker iets oor jou liggaam en leefstyl vertel? Dr. Arien van der Merwe, ’n mediese dokter wat onder meer in holistiese berading, natuurlike medisyne en vrouegesondheid spesialiseer, verduidelik hoekom ons na soetgoed smag, en wat ons daaraan kan doen.

Mary-Ann Prince is ‘n gekwalifiseerde maatskaplike werker, terapeut en aanbiddingsleier wat nog altyd daarop gefokus het om mense te help om hulle stem terug te kry. Nadat sy jare lank ander deur hulle moeilikste seisoene gelei het, het sy ‘n nuwe roeping betree – musiek. Haar debuutenkelsnit, Define Me, is ‘n gewaagde verklaring dat geen terugslag die finale woord is nie.