Deur middel van hierdie radioprogram poog RSG om nie-gestremdes 'n beter begrip te gee van die probleme en suksesse van persone met gestremdhede.
19 Julie 2026: Ons beantwoord luisteraars se vrae oor meervoudige sklerose, soos watbedoel word met MS-uitputting en “brain-fog”. ‘n Spesiale Sondag vir persone met gestremdhede word in Augustus gehou. Die doel is om gestremdes bewustelik deel te maak in kerke en geloofsplekke. Die tema vanjaar fokus op die voorreg wat saamwees in geloofsgemeenskappe inhou.
12 Julie 2026: Die impak van psigososiale gestremdhede op die persoon en sy naasbestaandes en vriende. Binah is ‘n Hebreeuse woord, wat “verstaan” beteken. Dit is die naam van ’n hulporganisasie in die Suid-Kaap vir kinders met spesiale uitdagings. Dis terapie vir die inwoners, en ‘n veilige woon- en werkplek vir die kinders, en maak ook voorsiening vir wanneer hulle ouer word.
5 Julie 2026: Psigososiale gestremdhede het nie net ‘n invloed op die persoon nie, maar ook op kollegas, familie en vriende. Die simptome is baie algemeen, dus is ‘n deeglike diagnose noodsaaklik om die betrokkenes beter te kan ondersteun. Tony Williams is al vir 42 jaar ‘n rolstoelgebruiker ná ‘n motorfietsongeluk, maar hy is lewenslustig en het nie stil gesit die afgelope dekades nie. Hy bevorder bewusmaking en toegangklikheid vir persone met gestremdhede.
28 Junie 2026: Cape Mental Health gee mense met geestesongesteldhede ondersteuning, veral diegene met psigososiale gestremdhede. Dis amper tyd vir die jaarlikse belastingopgawes. Wat is die prosedure as jy nog nooit geëis het nie? Kan jy enige jaar begin? Sal dit terugwerkend wees? Wat anders as mediese onkoste kan geëis word? ‘n Belastingspraktisyn beantwoord algemene navrae oor belasting en eise vir mense met gestremdhede.
21 Junie 2026: Innovation for the Blind is besig met ‘n praktiese benadering om mense met visuele gestremdhede te bemagtig met vaardigheidsontwikkeling op verskeie vlakke. Irene Fischer, ‘n voormalige radio-omroeper, probeer haar bes om voluit te leef met ’n erge breinbesering wat sy opgedoen het tydens ‘n ongeluk. Sy vertel van die uitdagings met geestesgesondheid.
14 Junie 2026: Wat is die nagevolge van ‘n breinaneurisme? Wat is die rol van rehabilitasie en ondersteuning? Professor Charl Hugo vertel van sy ervaring deur moeilike tye, en die ondersteuning van vriende en familie. Redelike akkomodasie en toegangklikheid vir mense met gestremdhede is tans ’n probleem. Die Nasionale Raad van en vir Persone met Gestremdhede werk hard om toeganlikheid in skole en openbare vervoer vir kinders met gestremdhede te bevorder.
