Trou is nie perdekoop nie

Sy trek Suid-Afrika se grootste sterre aan, maar wie is die vrou agter die fynste kant en couture? In hierdie episode nooi Anel Botha ons agter die skerms van die wêreld van trourokke. Sy deel die kosbare reël wat sy by ’n ou tannie geleer het: “Show what you can and hide what you must.” Vind uit wat die oorspronklike verrassende rede vir strooimeisies en strooijonkers is, hoe om die perfekte ontwerp te kies, en die geheime truuks wat verseker dat jy op jou groot dag beeldskoon lyk én gemaklik voel.

Sy is een van Suid-Arika se grootste sterre, maar is self al deur diepe waters, want weke voor haar 40ste verjaarsdag het Sandi Schultz ’n besluit geneem wat haar lewe onherroeplik sou verander. Sy ontbloot hoekom sy aanvanklik die huwelik afgesweer het, en die diep vrese wat sy moes oorkom. Sy gesels openhartig oor haar man, die hartverskeurende oproep wat geen lewensmaat ooit wil kry nie, en die een laaste boodskap wat sy vandag vir hom sou gee as sy nog net een kans kon kry. ’n Rou en eerlike gesprek oor hoekom trou – en rou – definitief nie perde koop is nie.

Wat is die geheime bestanddeel van ’n sprokiestroue, wat mense vir jare sal laat gons? Ingrid Johnson, die funksiebestuurder by die ikoniese Babylonstoren, en Constance Stuurman, tuin- en blomkunstenaar, verklap hoe hulle drome bewaarheid, maar altyd met ’n onverwagse kinkel. Behalwe die trou-towerkuns, verken ons die 16-jarige reis van hierdie Bolandse juweel. Van die geskiedkundige prag van die 1800-hoofhuis by Soetmansvlei en die eksklusiewe Chianina-vleis, tot die bekende Babel- en Glaskas-restaurante. Dis ’n inspirerende kykie agter die skerms van plaasvars luuksheid wat jy móét sien.

Wat gebeur as jy die vrou van jou drome ontmoet, haar trakteer op ’n garage-burger, maar vergeet om haar nommer te vra? Aktrise Bertha le Roux-Wahl en haar man, Karel, lig ná 24 jaar se huwelik die sluier oor hulle twee-weke-reël, die een reël wat amper hulle eerste jaar gekelder het, en hul passie vir die langpad as gesin. Hierdie is ’n eerlike, skreeusnaakse kykie na die lesse wat jy slegs leer as jy vir twee dekades saam die pad verken.

Hulle is van dag een af in die openbare oog, maar wat hou die Bergs se huwelik staande? In hierdie kragtige episode deel Hykie en Gerridene Berg hulle unieke reis. Gerridene vertel hoe die Here haar hart vier jaar lank voorberei het op haar rol as vrou, terwyl Hykie die lesse van radikale vergifnis en gebed deel. Ontdek hoe hulle gesinsvisie en -missie as kompas dien vir elke groot besluit in hulle loopbane. Dis ’n verhaal van ondersteuning, geloof en ’n liefde wat doelgerig leef.

Beplan jy jou droomtroue? Mariet van Niekerk, eienaar van BRUIDSGIDS en WEDDING GUIDE, verduidelik hoekom ’n fisiese gids en joernaal onmisbaar bly in ’n digitale era. Ons verken die naatlose skakel tussen die tydskrif en aanlyn-inspirasie, en hoe die WEDDING JOURNAL jou help om alles, van wittebroodbegrotings tot uitnodigings, presies te beplan. Mariet deel ook kundige raad oor die perfekte tydlyn vir sonsondergangfoto’s, en die realiteit van trourokke koop teenoor huur. Kry die spesialisraad wat elke bruid (en bruidegom) nodig het.