Trou is nie perdekoop nie

Met 25 jaar se radio-ervaring het die legendariese DJ Reggie Philander al álles by troues gesien! In hierdie episode deel hy intieme, skreeusnaakse én grillerige stories wat jou hare sal laat regop staan. Reggie verklap die geheime wetenskap van die perfekte troue-speellys, en watter liedjies gewaarborg is om enige dansvloer aan die brand te steek. Hy praat ook oor die emosionele impak van musiek, en hoe dit ‘n troudag kan maak of breek.

S2E19: Is dit Velts, De Villiers of Velthuizen? Ons gesels ons met die bekende paartjie, André en Juanita Velts, oor die storie van hulle “van-dilemma”. Hulle vertel hoe die eerste agt jaar van hulle huwelik, sonder kinders, gehelp het om die grondslag te lê om ‘n rotsvaste fondasie te bou. Ten spyte van reuse uitdagings (die moeilike swangerskap van hulle eerste kind, Covid, én ‘n pa wat ernstig siek was) het hulle as paartjie net sterker geword. Ons hoor hoe hierdie stewige fondasie hulle help om die strawwe vermaaklikheidsbedryf saam te trotseer.

S2E18: In hierdie aangrypende episode gesels Sharon en Mogamat Jephta oor hulle merkwaardige huwelik van byna 40 jaar. Hulle ontmoet as strooijonker en strooimeisie in ’n kerk—sy ’n Christen-konstabel en hy ’n Moslem-groentjie. Weens polisiereëls moes hulle hulle liefde geheim hou met vroeë oggendoproepe vanaf ’n tiekieboks. Mogamat deel openhartig hoe Sharon se diep liefde vir die Here sy hele lewe verander het. Vandag is hulle suksesvolle skrywers wat passievol oor die huwelik en ouerskap gesels. ’n Eerlike, hoopvolle storie van geloof, uithouvermoë en ware vennootskap wat jy nie mag misloop nie!

S2/E17: Die saadjie vir die trots Afrikaanse Netflix-treffer, Bruid van die Jaar, is 21 jaar gelede geplant, en kry nou eers kans om te ontkiem. Hoe lyk die liefde agter die skerms? Vervaardigers Luke en Carine Rous is al 18 jaar getroud, en verklap hoe net absolute geloof hulle staande hou. En dink jy Bouwer Bosch was die eerste keuse vir die romantiese manlike hoofrol? Dink weer! Bouwer gesels saam, en deel kaalvuis oor sy oudisiestryd, wat hy op stel moes leer, en sy diep liefde vir sy eie gesin.

S2/E16: Charlie Bouguenon het sy hart op Anré, ‘n jong nooi van Upington, verloor. Hy het 22 uur per bus na haar tuisdorp gereis om by haar ouerhuis dit opsitkers aan te steek. Hy vertel hoe ‘n vorige langtermynverhouding, waartydens hy verloof was, hom genoop het om homself in die oë te kyk en die moeilike besluit te maak om daarvan weg te stap. Alles het daarna ten goede uitgewerk het, want vandag is hy en Anré reeds agt jaar gelukkig getroud met sterk, gemene beginsels waarop hulle huwelik se fondasie gebou is.

In hierdie kragtige episode gesels die bekende Zane Meas openhartig oor sy 34-jaar pad saam met sy vrou, Megan. Vanaf daardie oomblik wat vir hom  liefde met die eerste oogopslag was,  tot die uitdagings van ’n swangerskap voor hul getroud was, deel Zane hoe een Pastoor se genade sy hele lewe verander het. Ontdek hoe sy passie vir vaderskap gelei het tot die ontstaan van  The Fatherhood Foundation en sy boek, “Daddy, Come Home”. Zane deel die grootste lesse uit sy huwelik en wat noodsaaklik is vir die  fondasie van ’n leeftyd saam. ’n Onmisbare kykie na geloof, herstel en ware liefde.