Wanneer dit voel asof almal om jou reeds hulle plek in die lewe gevind het, hoe maak jy vrede met jou eie pad? In Halfpad daar, Sophia van Taak se radiodrama wat op Donderdag 19 November 2026 om 20:00 op RSG uitgesaai word, ontmoet luisteraars vir Retha, ’n vrou in haar veertigs wie se senuwees begin uitrafel. Van Taak behartig ook die regie van hierdie verhaal oor werksdruk, verwagtinge en die ontstellende vermoede dat jou lewe anders moes verloop het.

Retha probeer kop-bo-water hou, maar alles raak skielik te veel. Die werk hou aan kom, die rekeninge wag en ander mense se verwagtinge druk swaar op haar. Tog is daar ook ’n ongemaklike vraag waarmee sy moet worstel: hoeveel van dié druk kom eintlik van haarself? Terwyl sy haar lewenskeuses bevraagteken, raak dit al moeiliker om verby die probleme van elke dag te kyk en moontlike oplossings raak te sien.
Haar tydgenote se lewens lyk gevestig en gelukkig. Sy spartel steeds van maand tot maand om die huur te betaal. Daardie vergelyking laat haar al hoe meer uitgelewer voel, totdat sy begin wonder of sy besig is om haar varkies te verloor. Retha bevind haar in ’n emosionele put en moet ’n manier vind om weer perspektief te kry. Maar waar begin ’n mens wanneer jou eie gedagtes jou telkens terugtrek na alles wat verkeerd loop?
Volgens Van Taak ondersoek die drama hoe die tirannie van die onmiddellike ’n mens in ongesonde denkpatrone kan vasvang. Wanneer elke probleem dringend voel, kan jou blik so vernou dat daar naderhand min ruimte vir enigiets anders oorbly. Retha verloor perspektief en begin haarself as ’n slagoffer van haar omstandighede sien. Haar verhaal raak daarmee aan ’n herkenbare ervaring: die oomblik wanneer die daaglikse gespartel jou laat twyfel aan die groter rigting van jou lewe.
Die inspirasie vir die drama is persoonlik. Van Taak vertel dat haar eie oomblikke van blinde paniek oor waarheen haar lewe op pad is, tot die storie aanleiding gegee het. Die negatiewe gedagtes waarmee Retha worstel, is ook vir haar bekend. Sy moet soms versigtig trap om nie self vasgevang te raak in die moedeloosheid wat ontstaan wanneer ’n mens jou lewe met dié van ander vergelyk nie. Hierdie eerlikheid vorm die vertrekpunt vir Retha se verhaal.
Van Taak hoop dat die drama veral aan middeljarige vroue wat hulle in soortgelyke omstandighede bevind, moed sal gee. Haar boodskap is dat ’n mens steeds seggenskap oor jou eie lewe en geluk het. Om verandering te bewerkstellig, vra egter dat jy self optree. Die ridder op die wit perd gaan nie noodwendig opdaag om alles reg te maak nie. Retha se worsteling bied dus ook ruimte vir die vraag: wat lê binne haar eie vermoë om te verander.
Erica Wessels vertolk Retha, met Andre Terblanche as Willem, Nienke Geldenhuys as Stef en die leser, Ansu van der Sluys as Fran-Louise, Dirk Stolz as Martinus, Èmil Haarhoff as Danny en June van Merch as Ester.
