Die Wêreld Gesondheidsorganisasie en Suid-Afrika het foute gemaak met besluite wat geneem is oor hoe om die Covid pandemie in 2020 en 2021 te hanteer.
Om die waarheid te sê het die besluitnemers so rigied en streng dogmaties opgetree dat hulle besluitneming herinner aan die onverbiddelike optrede van die ortodokse kerke in die verlede.
Twee navorsers, Alex Broadbent en Pieter Streicher het die data ontleed om vas te stel hoe en of sekere besluite oor die hantering van die Covid pandemie die verspreiding en aard van die siekte verander het, en of dié besluite enigsins korrek was. Hul ontleding van die data – ‘n omvattende studie – is in die boek Power, Knowledge, and Covid-19, The Making of a Scientific Orthodoxy. Klik op hierdie skakel om die boek gratis af te laai om na al die ontledings te kyk: https://www.taylorfrancis.com/books/oa-mono/10.4324/9781003732495/power-knowledge-covid-19-alex-broadbent-pieter-streicher
Dr Streicher bespreek op 16 April om 12:30 hierdie bevindings by die Universiteit van Stellenbosch se Departement van Filosofie.
Luister Woensdag om 11:30 na die gesprek met Dr Piet Streicher op Gesondheid op RSG.
In deel 1 van die kort reeks fokus ons op vier foute.
Fout 1 – Verkeerde advies
Die WGO het slegs na een raadgewer geluister, en dié raadgewer, die Imperial College of London, het foute gemaak oor die voorspellings van hoe die pandemie sal uitbrei. Hulle het dit met ‘n faktor van sowat 10 oorskat. In gevalle is die voorspellings met ‘n faktor van tussen 3 en 30 oorskat. Selfs nadat data getoon het dat die College se voorspellings verkeerd is, en hulle later wel hul voorspellings aangepas het, het hulle nooit erken dat hul voorspellings verkeerd was nie. Die WGO gebruik steeds dié College vir raad.
Oplossing: Die WGO kan nie net op een instansie staatmaak vir raad nie. Dit is egter steeds die geval.
Fout 2 – SA en verkeerde voorspellings
Suid-Afrika en die Wes-Kaap het aanvanklik die College se verkeerde voorspellings via die WGO gevolg. In Wes-Kaap is die KIKS ingerig as ‘n nood-eenheid vir al die Covid-gevalle, maar gelukkig het hulle, toe Streicher hulle adviseer met korrekte data, Streicher se voorspellings gevolg, wat duidelik in die kol was.
Oplossing: Die Regering kan nie net op ‘n klein groep medici en wetenskaplikes staatsmaak vir raad nie. Daar moet meer wees, en die spektrum van kundigheid met breër wees.
Fout 3 – Inperkings maak min verskil
Volgens die College sou inperkings die eksponensiële verspreiding van die virus stop, en as die inperkings opgehef word, sou die virus eksponensieel verder versprei. Dit het nie gebeur nie. In die eerste plek help inperkings min as die virus reeds in baie areas is. Inperkings help die beste as jy ‘n siekte tot ‘n sekere klein area wil beperk. Tweedens het die opheffing van die inperkings in SA – wat gebeur het toe die epidemie nog aan die toeneem was – glad nie gelei tot ‘n verhoogde toename nie.
Olplossing: Die WGO kan nie net op een instansie staatmaak vir raad nie. Dit is egter steeds die geval. Elke land se Regering kan nie net op ‘n klein groep medici en wetenskaplikes staatsmaak vir raad nie. Daar moet meer kundiges wees, en die spektrum van kundigheid met breër wees.
Fout 4 – Raadgewende medici tree dogmaties, outoritêr en onverbiddelik op met geen ruimte vir debat nie
In Suid-Afrika, en ook in die meeste ander lande, het die klein groep medici wat gekies is om die regering te adviseer, baie onverbiddelik opgetree, asof hulle al die antwoorde ken, en geen ruimte gelaat vir debat nie.
Enigeen wat van hulle verskil het, is verdag gemaak. Dit het gelei tot sterk teenoorstellende groepe, want sterk dogma na een kant skep sterk dogma na die ander kant.
Oplossing: Die Regering kan nie net op ‘n klein groep medici en wetenskaplikes staatsmaak vir raad nie. Daar moet meer kundiges wees, en die spektrum van kundigheid met breër wees. Die kundiges moet ook nederigheid behou, en nie streng dogmaties word nie. Debat moet toegelaat word, en die kundiges moet oop wees vir ander insigte.
Volgende kyk ons die besluite oor maskers en die entstowwe.
