’n Kosblik mag dalk eenvoudig lyk: ’n broodjie, vrugte, ietsie te drinke en dalk ’n versnapering. Maar van die oomblik wat kos uit die yskas gehaal word tot wanneer dit uiteindelik geëet word, is daar heelwat wat kan bepaal of daardie kos nog veilig is. Ons praat met Annelien Pienaar, ’n voedselwetenskapdosent en skrywer oor een van die daaglikse uitdagings in baie huishoudings: kosblikveiligheid. Wat pak jy, hoe pak jy dit, en veral, hoe hou jy kos koud genoeg totdat dit geëet word? Is daardie kosblik wat vanoggend vars gepak is, nog veilig teen middagete?