Ons het al in Devilsdorp gekyk na die afspraakmoorde in Krugersdorp, en in Steinheist na Markus Jooste se doenighede. Daar was ook al flieks oor Harvey Weinstein gemaak in She Said, en ook oor die berugte swendelaar Bernie Madoff.  Nou is daar ‘n dokumentêr uitgereik wat jou in verstomming sal laat kyk waarmee hierdie skelm alles weggekom het. Hy het onder andere sy beleggers se pensioengeld gesteel en bote en vakansiehuise daarmee gekoop, maar dit nooit belê nie. En hy het dekades lank daarmee weggekom.

In MADOFF: THE MONSTER OF WALL STREET word daar noukeurig gekyk na wat hy alles aangevang het, met ook gedramatiseerde tonele. Hy is dikwels ondersoek, maar het telkens daarin geslaag om met sy seepgladde leuens en gemaklike sjarme selfs ondersoekbeamptes om die bos te lei. As jy wil weet hoe hy uiteindelik betrap is, kyk na MADOFF: THE MONSTER OF WALL STREET, en vergelyk dit ‘n bietjie met Steinheist.