SONDUIKER deur Anton Treurnich
Regie: Frieda van den Heever

Episode 35: Chinel moet tussen haar werk deur vir Alwyn aan die een kant, en Magnus aan die ander, hanteer. Zane sien dat Alwyn sakke in die vliegtuig laai wat baie verdag lyk, maar daar is niks wat hy daaroor kan doen nie. Wolfgang snoep by die lughawe rond. Dotty kom dadelik agter dat Wolgang te veel vrae het oor Lusinda se verdwyning, en begin wonder of hy iets daarmee te doen het.

Tenita Kidelo gesels met Miche van Wyk oor dramastudies, en kuier ook by ‘n matrikulant wat ‘n sopkombuis in sy gemeenskap oprig.

Dr. John Kani vertel van hoe sy toneelstuk, Kunene and the King, gereken word as een van die Royal Shakespeare Company se Top 10 produksies van die afgelope 60 jaar.

In die reeks, EK EN MY INSTRUMENT, gesels Christelle Webb-Joubert met die fluitis Melanie Hofmeyr-Burger.

Philip Rademeyer het Elsa Joubert se boek, Spertyd, verwerk vir die verhoog. Hy vertel van die uitdagings.

Hennie Meyer praat oor sy digbundel, Winkel van wanklanke.  Dis sy debuutbundel, en hy skram nie weg daarvan om met groot figure in die Afrikaanse digkuns en internasionale kunstenaars soos Jackson Pollock, Picasso en Yves Klein in gesprek te tree nie. Dit is veral ’n konseptuele bundel, wat die idee van wat ’n bundel is of kan wees, bevraagteken.

Marion Holm lees Jeanne Goosen se kortverhaal, HERMIONE.

Christelle Webb-Joubert praat met narratiewe terapeut Johan Laten oor depressie.

Mikotoksiene kom tot in 30% van die wêreld se voergewasse voor. Albert van Rensburg van Biomin Suid-Afrika praat hieroor. Leon Kruger van die Universiteit van die Vrystaat is aan die woord oor die rol wat miseiertellings by wurmparasietbeheer speel. Ons kry duidelikheid oor die Wet op Lewende Mariene Hulpbronne by Petrus van der Walt van VDT Prokureurs.

Sowat een uit 100 mense is op die outisme-spektrum, maar moontlik is slegs sowat 10% van dié mense in Suid-Afrika gediagnoseer. Baie mense op die outisme-spektrum, maar wat goed funksioneer, word nooit gediagnoseer nie. Tog het hulle probleme wat hulle lewe moeiliker maak. Marí Hudson praat hieroor met prof. Petrus de Vries, ‘n kinder- en tienerpsigiater aan die Universiteit van Kaapstad.

SONDUIKER deur Anton Treurnich
Regie: Frieda van den Heever

Episode 36: Magda en Chinel is saam die bos in om die meerkaaie se sosiale interaksie dop te hou, maar eintlik is hulle besig om mekaar dop te hou. Wolfgang wil vir Dolla sien. Hy het iets belangrik om met haar te bespreek. Dolla en Dotty kom af op ‘n belangrike leidraad wat met Lusinda se verdwyning te doen het.

‘n Onwaarskylike vriendskap.

Tenita Kidelo gesels met lewensafrigter Cameron van Rensburg oor hoe om die regte loopbaankeuse te maak. Hulle gesels ook oor boeliegedrag en depressie onder jongmense.

Luister na’n fluitkonsert van Johan Quantz, en Henryk Wieniawski se Vioolkonsert no. 1 in F-kruis-mineur.