10 Mei 2026 17:00

** Die hoofsekretaris van die SAKP, Solly Mapaila, het 'n beroep op die parlement gedoen om die skepping van 'n komitee te bespoedig wat die moontlike klagte teen President Cyril Ramaphosa sal ondersoek rakende die Phala Phala diefstal-debakel. Dit volg nadat die Konstitusionele Hof Vrydag beslis het dat die parlement se verslag oor Ramaphosa se moontlike vervolging geldig is. ** Die premier van die Noord-Kaap, Zalqani Saul, het die nasionale regering se afkondiging van 'n ramptoestand oor onder meer dié provinsie verwelkom. Die toestand is vroeër oor die Noord-Kaap, Wes-Kaap, Oos-Kaap, Noordwes, Mpumalanga en die Vrystaat afgekondig ná swaar reën en oorstromings. Saul sê die verklaring sal onder meer help om geld vir buitengewone hulpprogramme beskikbaar te stel. ** Die Valke het elf verdagtes by 'n brandstofaanleg in Meyerton in die suide van Gauteng in hegtenis geneem in verband met die beweerde diefstal van diesel. 'n Woordvoerder van die Valke, Christopher Singo, sê die groep, onder wie twee sekuriteitswagte en 'n aantal buitelanders, het na bewering die gesteelde diesel onderweg na die aanleg onderskep. ** Die Israelse weermag sê hy het meer as 40 persele getref wat deur die Hezbolla-organisasie in die suide van Libanon gebruik is. Nagenoeg 40 mense, insluitend burgerlikes, is gister in hewige Israelse aanvalle in die gebied dood. ** En in Motorfietswedrenne het die Spanjaard Jorge Martin van Aprilla die Franse MotoGP in Le Mans gewen. Sy spanmaat Marco Bezzecchi van Italië was tweede, met die Japanse jaer Ai Ogura op nog 'n Aprilla van die susterspan Trackhouse Racing in die derde plek. Martin het ook gister se Kitsren gewen.