Skrywers en Boeke

27 Mei 2026: Ilse Salzwedel gesels met Anoeschka von Meck oor haar boek, TWA DIE TYDLOPER. Johan Myburg het bydraes oor die wenners van twee gesogte internasionale letterkundepryse, die Dylan Thomas-prys en die Booker International. Hy gesels ook oor nuwe boeke vir jou leeslysie. Vir radiodramaskrywers is daar twee laaste slypklasse met raad oor die ontwikkeling van ‘n storielyn en die gebruik van byklanke. Jy kan ook hoor van die eer wat Dalene Matthee onlangs te beurt geval het toe sy postuum met die Orde van Ikamanga (Brons) vereer is.

20 Mei 2026: Luister na ‘n onderhoud uit 1996 waarin wyle Madelein van Biljon met Daniël Hugo gesels oor lees. Johan Myburg sorg weer vir interessante nuus uit die internasionale boekewereld. Hy gesels oor die wenners van die British Book Awards, of Nibbies, en vertel ook meer oor Haruki Murakami se jongste roman en ‘n Engelse vertaling van die skrywer Mario Vargas Llosa se jongste roman. Voornemende skrywers – veral van radiodramas, maar eintlik sommer almal wat daarvan droom om fiksie te skryf – moet ook ingeskakel bly vir nog twee bydraes wat Ina Strydom en Kobus Burger saamgestel het as skryfhulp vir radiodramaskrywers. Jy kan ook hoor wie aangewys is as wenners van LAPA se Jeugromankompetisie.

Ilse Salzwedel gesels met Bun Booyens, wie se boek, TROEP, onlangs met die LW Hiemstraprys vir nie-fiksie bekroon is. Johan Myburg gesels oor literêre toerisme, en vertel meer oor ANGEL DOWN deur Daniel Krause, wat as die wenner van die Pulitzerprys vir fiksie aangewys is. Hy bring ook hulde aan die Britse digter, Carol Rumens, wat onlangs oorlede is. Radiodramaskrywers moet inskakel vir Ina Strydom se raad oor die skryf van dialoog.

Ilse Salzwedel gesels met Tom Dreyer, wie se debuutbundel, NOU IN INFRAROOI, onlangs met die Hertzogprys bekroon is. Jy kan ook hoor hoe klink van die gedigte uit die bundel. In Johan Myburg se drie insetsels uit die internasionale boekewêreld, kan jy meer uitvind oor die Miguel de Cervantes-prys vir Spaanse letterkunde. Hy vertel ook meer oor Marcia Hutchinson, ‘n 63-jarige vrou van Nigerië, wie se debuutroman gekortlys is vir die gesogte Women’s Prize for Fiction. Johan bring ook hulde aan die Australiese skrywer, David Malouf, wat onlangs oorlede is. Daar is nuus oor die Dalene Matthee-boekefees op Herold in die Outeniqua-berge. Ina Strydom gee in twee insetsels goeie skryfraad vir almal wat ‘n radiodrama wil skryf.

Luister na ‘n hoorbeeld oor die digter Ina Rousseau, wat vanjaar 100 jaar gelede gebore is. Dis in 1996 saamgestel vir haar 70e verjaarsdag. Sy praat oor haar lewe en werk, en kenners soos Danie van Niekerk, Braam de Vries, Koos Human en Danie Botha kan ook gehoor word. Wyle Margot Luyt lees van Rousseau se gedigte voor. Johan Myburg praat oor die kortlys van die Women’s Prize for Fiction, en vertel meer oor Harper Lee en die wetenskapfiksieskrywer Arthur C. Clarke. Jy kan ook luister na die eerste van ‘n reeks insetsels wat Kobus Burger en Ina Strydom saamgestel het waarin hulle praktiese raad gee vir voornemende radiodramaskrywers. Dis nou vir almal wat wil inskryf vir RSG en die ATKV se radiodramaskryfkompetisie, waarin R130 000 se prysgeld op die spel is.

Ilse Salzwedel gesels met die joernalis en skrywer, Julian Jansen, wie se jongste boek, OP DIE SPOOR VAN DIE STASIEMOORDENAAR, onlangs verskyn het. Johan Myburg vertel meer oor die wenner van die Hans Christian Anderson-kinderboekprys asook die Hans Christian Anderson-letterkundeprys, en die wenners van die gesogte Windham-Campbell-letterkundepryse. Jy kan ook meer uitvind oor Wêreldboekedag wat op 23 April gevier word. Vind meer uit oor die Tafelbaai-leeskring se virtuele leeskring-byeenkoms oor twee kontinente, wat verlede week plaasgevind het. Daar is ook nuus oor die Jeffreysbaai Kunskoors-boekprogram, wat van 1 tot 3 Mei plaasvind.