Agter die tunes

S1E20: Die grootste en gewildste musiekprogram op Suid-Afrikaanse TV die afgelope paar dekades, is beslis Noot vir Noot. Barrie Ferreira praat met Johan Stemmet, wat die program vir amper 30 jaar aangebied het, oor die rol van musiekprogramme in die plaaslike musiekbedryf. Johan vertel hoekom Noot vir Noot so gewild was, hoekom hy besluit het om uit te tree uit die program, en hoekom musiekprogramme nie meer so gewild is soos wat dit was nie. Hy word ook op die proef gestel met ’n Raai-die-liedjie-uitdaging om te sien of hy 50 Randjies sou kon wen…

S1E19: Openbare betrekkinge speel ‘n belangrike rol in alle bedrywe, meer nog in die musiekbedryf. Nie té lank terug nie, was dit die rol van PR-agente om die profiel van ‘n kunstenaar te bestuur, maar met sosiale media stel musikante hulleself baie meer bloot. Liny Kruger, ‘n PR-praktisyn met 25 jaar se ondervinding in die musiekbedryf, vertel hoe haar rol verander het. Is die mistiek van ‘n kunstenaar nou iets van die verlede? Is dit so dat ‘n musikant ‘n alles-of-niks mentaliteit moet hê? Met name soos Fokofpolisiekar, Mango Groove, Die Heuwels Fantasties en Janie Bay op haar CV, deel Liny hoe sy die musiekbedryf tans beleef.

S1E18: Dis raar dat ‘n nuwe opkomende kunstenaar elke aspek van hulle musiek self sal aanpak. Tia van der Berg, of Skeur, het besluit sy sal elke deel van haar musiekloopbaan self behartig – van die lirieke, produksie en vrystelling tot musiekvideo’s. Barrie Ferreira gesels met haar oor hoekom sy besluit het om hierdie roete te volg. Sy vertel hoe sy met selfvertroue as kunstenaar gesukkel het, en hoe sy graag musiek wil vrystel wat eg is aan haar, en nie wat enigiemand anders wil hê nie. Sy deel ook hoekom haar kat erkenning kry as bydraer tot een van haar liedjies.

S1E17: Early B het die musiekbedryf betree toe rap nie ‘n gewilde genre was nie. Spring na 2026, en dit is onwaarskynlik dat enige groot musiekfees sonder Early B sal voortgaan. Hy al met van die grootste name in die bedryf gewerk, soos Francois van Coke, Janie Bay, Die Heuwels Fantasties en Jack Parow. Barrie Ferreira gesels met Early B oor hoe hy begin het deur sy liedjies gratis te Bluetooth aan konsertgangers, tot waar hy vandag oorsee optree. Hy word ook op die proef gestel met ‘n onverwagse rap-uitdaging…

S1E16: Liefde by die Dam is een van die Suid-Afrika se mees gewilde musiekkonserte. Kaartjies word binne enkele ure uitverkoop. Hoe het alles begin, en hoe word so ‘n groot konsert gereël? Barrie Ferreira praat met Pierre Greeff, die hoofsanger van Die Heuwels Fantasties en ’n mede-eienaars van Liefde by die Dam. Pierre deel sy ervaring as iemand wat nie net deel is van die fees se reëlings nie, maar ook as sanger.

S1E15: Ruk en Rym is ‘n sangkompetisie wat in 2026 vir die vierde keer aangebied word. Barrie Ferreira vind uit waaroor die kompetisie gaan, wat dit uniek maak, en hoe dit ’n geleetheid skep vir kunstenaars wat nie deel is van die hoofstroom nie. Hy praat met fir kreatiewe regisseur, Jaco van der Merwe, en met 2025 se wenner, Magé.