Binne en Buite

Binne en buite: DJ Muller en ds. Fanie Kriel praat oor die metaforiese “leeus” van die moderne lewe – werksdruk en finansiële onsekerheid – wat die menslike liggaam in ‘n konstante veg-of-vlug-toestand hou en uiteindelik lei tot chemiese uitputting en uitbranding. Fanie beklemtoon dat mense dikwels huiwerig is om hulp te soek vir emosionele probleme “bo die nek” en moedig luisteraars aan om hulle gevoelens te verwoord of neer te skryf ten einde perspektief te kry. Die gesprek fokus op die verskuiwing vanaf ‘n prestasiegedrewe samelewing na ‘n benadering waar ‘n mens leer om te “oefen” eerder as om net te “probeer”, en om vrede te maak met ‘n lewe wat nie altyd perfek is nie.

21 Junie 2026: DJ Muller gesels met Koos Pretorius oor die enorme druk van onsekerheid wat hy en sy gesin tans ervaar weens ekonomiese druk en grootskaalse afleggings by die myn waar hy werksaam is. Koos vertel hoe hy, sy vrou Elizma en hulle tienjarige seun saamleef met die wete dat sy pos tans in die weegskaal is – ‘n uitmergelende situasie wat hy beskryf as ‘n “swaard oor sy kop” waarvoor ‘n mens nie werklik kan voorberei nie. Hierdie krisis is besonder kompleks omdat die myn die hele dorp en hulle behuising besit, wat beteken dat die verlies van sy werk ook die verlies van hulle huis en hulle kind se skoolstabiliteit sou beteken. Hoe hanteer hulle hierdie druk?

14 Junie 2026: Kliniese sielkundige Cornel van der Merwe werk al 21 jaar lank met kinders en hulle gesinne. Sy praat oor die toenemende druk waaronder kinders in Suid-Afrika leef – van akademiese oorlading tot afknouery en sosiale media – die tekens van uitbranding wat ouers dikwels mis, en praktiese raad oor hoe ouers ‘n veilige ruimte kan skep waar hulle kinders kan sê: Ek is nie oukei nie.

7 Junie 2026: Flippie Vermeulen het meer as ‘n halfeeu gelede begin vlieg. Hy het sedertdien meer as 27 000 ure in die lug opgebou in meer as 100 vliegtuigtipes – van die Douglas DC-4 tot die Airbus A340. Hy vertel wat die lugvaart hom geleer het oor drukhantering, besluitneming, spanwerk, die dissipline om kalm te bly wanneer dinge fout gaan, en hoe hy die Here op 35 000 voet beleef.

31 Mei 2026: Frieda van den Heever is ‘n bekroonde musikant, aktrise, stemkunstenaar en predikant by InVia Gemeente, en vir baie RSG-luisteraars ‘n bekende stem as voormalige aanbieder van Vers en Klank. In 2021 het haar man, die draaiboekskrywer Leon Kruger, skielik in haar arms gesterf. Frieda praat oor die druk van skielike verlies, hoe sy as enkelma moes leer om weer asem te haal, en hoe haar geloof en kuns haar deur die donkerste tyd van haar lewe gedra het.

24 Mei 2026: Anthea Carlse is ‘n vrywillige noodwerker en paramedikus. Sy en haar span is opgeleide vrywilligers uit die gemeenskap wat brande bestry en by noodgevalle eerste op die toneel is, dikwels voor die ambulans of ander nooddienste opdaag. Hulle werk nie skofte nie, is basies altyd aan diens, en werk soms 48 uur aaneen. Anthea vertel vir DJ Muller wat dit aan ‘n mens doen om die soms grusame tonele te sien, hoe sy die trauma saamdra huis toe, en wat haar help om aan te gaan.