1. Voorverhit die oond tot 200 °C. Voer ’n bakplaat met bakpapier of foelie uit en smeer liggies met olie. OF berei matige kole vir die quesadillas – die tortillas moenie brand voor die kaas gesmelt het nie.
2. Meng die kaas, mieliepitte, sprietuie en gekapte koljander saam en geur na smaak.
3. Tortilla-wiggies: Sny 2 van die tortillas in 8 wiggies, soos ’n pizza, en hou die res heel.
4. Pak die wiggies op die bakplaat en skep helfte van die kaasmengsel met van die tamaties eweredig bo-op.
5. Skakel die oondroosterelement aan en rooster vir 10 minute of tot die kaas gesmelt het.
6. Quesadillas: Verhit intussen ’n groot braaipan oor ’n matige hitte of beplan om dit oor matige kole te maak.
7. Verdeel die orige kaasmengsel en tamatieskyfies tussen 2 van die heel toritillas. Sit ’n tweede tortilla bo-op elkeen en druk liggies vas.
8. Plaas een quesadilla op ’n keer in die pan. Rooster aan die een kant tot goudbruin en die kaas begin smelt. Draai versigitg met twee groot eierligters om en rooster die ander kant tot goudbruin.
9. Sny quesadillas in wiggies en sit dadelik warm voor. Garneer met vars koljanderblare.

OOR DIE KOLE: sit ’n stuk foelie op ’n groot toeklap-rooster. Plaas die gevulde tortillas langs mekaar op die foelie. Plaas oor die kole tot die kaas gesmelt het en draai dan vinnig om, om die bokant kleur te gee. Indien verkies, kan die quesadillas soos in stap 8 opgedraai en aan die ander kant gerooster word.

Wenke

1. Indien jy van vars brandrissies of jalapeños hou, kap dit fyn en roer dit by die kaasmengsel of sit met die warm wiggies voor.
2. Net die mengsel van kaas, sprietuie en mielies is heerlik met repies gaar spek, oorskiet-steak of hoender vir ’n meer vullende ete.