Die Innibos Kinderboekekrôl was 'n jolige affere waar jonk (en minder jonk!) hulle behoorlik verluister en vergaap het. Daar was bere, hasies, seerowers wat nie wou bad nie, 'n bed waarop so hard gebons is dat hy maan toe gevlieg het, en nog baie lekkertes. Ses kleuterskole se personeel het het elkeen 'n kinderboek van LAPA voorgelees, en baie moeite gedoen om die terrein van die Hoërskool Nelspruit te omskep in 'n fantasiewereld vir die heel kleintjies. By elke storiestasie kon die kleintjies na 'n ander storie luister en 'n persentjie kry vir hulle storiesak sodat hulle hierdie heerlike dag nog baie lank kon onthou.