Hartsake — ’n moderne tragedie uit die pen van Joe Kleinhans, onder regie van Luan Jacobs — delf diep in die psige van liefde, verlies en die stille brutaliteit van alledaagse verhoudings.
In die wêreld van sepies en skyn, is daar soms net een storie wat te na aan die hart lê. Wanneer die akteur agter Dokter Tobie Thompson self in die hospitaal beland, vervaag die grense tussen fiksie en werklikheid.
Met ’n rolverdeling wat menslikheid rou laat klink, word die luisteraar ingetrek in ’n web van emosies waar selfs die sterkste harte breek.
Met Robbie Wessels, Renske Jacobs, Kaz McFadden, Imarie Oberholzer, Antowan Nothling en Elzabé Zietsman in die rolverdeling en Luan Jacobs as regisseur.
Agter van links na regs: Antowan Nothlin, Imarie Oberholzer, Elzabe Zietsman, Kaz McFadden, Robbie Wessels en Renske Jacobs. Voor is Luan Jacobs.
Hartsake deur Joe Kleinhans, Donderdagaand 28 Mei in Radioteater om 8 uur op RSG of rsg.co.za, die RSG APP en beskikbaar as potgooi en op Spotify na afloop van die uitsending.
Dis meer as ’n sepie — dis ’n spieël. Hartsake wys hoe dun die lyn is tussen die rol wat ons speel en die lewe wat ons lei. Elke karakter dra ’n hart wat klop van waarheid. Van Joshua se trots tot Cindy se stilte — dis mense wat ons almal ken, al woon hulle net in klank.
Die regie vat jou binne-in die stilte tussen woorde. Luan Jacobs bring ’n spanning en menslikheid wat jou laat luister met jou hele lyf.
Die storie wys hoe maklik liefde in beheer verander. In ’n wêreld van subtiele manipulasie en onverwerkte trauma word “ons” soms die gevaarlikste plek om te wees.
Elke klank is ’n hartklop — rou, eerlik en onontkombaar. Dis klankdrama wat nie net gehoor word nie, maar ervaar word.
Die storie
In die radiodrama verwys Hartsake na ‘n gewilde sepie. Die dramatiese 3000ste episode daarvan, word beplan met sy Hoof van Ongevalle, dokter Tobie Thompson, gespeel deur die karakter Joshua Jooste, die spilpunt waarom die nuwe verwikkelinge in die sepie draai.
Voor dit gebeur, gaan Joshua egter vir ‘n roetine mediese ondersoek en dit lewer ‘n abnormale EKG op. Sy lewe verander in ‘n nagmerrie. Hartsake word oornag ‘n oorlewingstryd vir hom. Hy sukkel om die een goëlbal na die ander te verwerk. En dis die persoon naaste aan hom, sy vrou Cindy, wat dit die meeste ontgeld.
Oor die skrywer – Joe Kleinhans
Joe Kleinhans vertel die verhaal vanuit ’n persoonlike ervaring.
Joe word ‘n polis aangebied op voorwaarde hy gaan vir mediese toetse. Die polis word afgekeur op grond van ‘n abnormale EKG. Hy word deur sy internis na ‘n kardioloog verwys wat op ‘n angiogram besluit. Die angiogram word op 5 Maart 2021 gedoen waarna hy in die hospitaal gehou word vir ‘n nood viervoudige hartomleidingsoperasie op 8 Maart 2021 omdat vier van sy kroon-slagare 90% vernou is.
Joe kry die raad dat ‘n goeie manier om die trauma te verwerk is om daaroor te skryf. En toe vloei Hartsake daaruit voort.
Van die regisseur – Luan Jacobs
Hartsake is ’n moderne tragedie wat delf in die broosheid van die menslike psige — waar liefde, beheer en oorlewing mekaar op onheilspellende maniere kruis.
In Joe Kleinhans se teks het ek ’n wêreld raakgelees waarin gewone mense onbewustelik hulself en mekaar manipuleer, dikwels uit vrees vir verlies of die ongemak van eerlike konfrontasie. Hierdie stom spanning — dié stil oorlog van emosies — wou ek in die regie laat asemhaal.
Tematies staan Hartsake binne die groter diskoers van geslagsgeoriënteerde geweld en die verrotting van empatie in die alledaagse samelewing. Tog is dit nie ’n moralistiese stuk nie, maar ’n spieël: een waarin ons almal onsself herken — moeg, bang, lief, en skuldig.
Die teks se ritme, kort tonele en vinnige oorgange het my laat werk met presiese klankteksture en stiltes as dramatiese wapens. Die ritme begin stadig, amper onskuldig, maar bou geleidelik tot ’n onafwendbare crescendo waarin keuses hul eie graf grawe.
My visie was om die luisteraar vas te vang binne hierdie web van emosionele spanning — om hulle te laat hoor hoe ’n hart nie net stadig siek word nie, maar stil. Want soms is die mees genadelose geweld dié wat sag fluister.
‘n Slang in die gras op Donderdag 21 Mei deur Chris Majiedt was die tweede prys wenner van die 2013 RSG radiodramaskryfkompetisie.
Slang en sy groepie helpers versamel kosbaarhede, veral koper en aluminium, by die asgate om te verkoop. Hulle was almal in die tronk, en lede van die tronkbendes. En daar is min genade vir dislojaliteit.
Met Chris Majiedt, Charlton George, Marlo Minnaar, Keenan Herman, Royston Stoffels en André Samuels in die rolverdeling en Eben Cruywagen as regisseur.
Chris Majiedt
Hierdie drama speel af in ’n milieu wat nog nie voorheen ontgin is nie, naamlik ’n stortingsterrein. Die karakters is almal oudgevangenes wat onder die ystergreep van SLANG, die hoofkarakter, ’n bestaan voer deur in die vullis te grawe op soek na glas, karton en metaal wat aan herwinningsaanlegte verkwansel word. In ’n wêreld waar normaliteit geweldig relatief is, voer die karakters van Slang in die gras ’n bestaan op ’n Kaapse stortingsterrein waar hulle weeksdae werk, saans kosmaak buite hulle plakkershut en om ’n vuurtjie ontspan, en naweke die plaaslike sjebien besoek. Verraad en bedrog word egter nie geduld nie en sal wraaksugtig en wreed gestraf word.
Chris Maijiedt het destyds vir die eerste keer ingeskryf die radiodramaskryfkompetisie en het ook die hoofrol van SLANG vertolk.
In ’n wêreld waar normaliteit geweldig relatief is, voer die karakters van Slang in die gras ’n bestaan op ’n Kaapse stortingsterrein waar hulle weeksdae werk, saans kosmaak buite hulle plakkershut en om ’n vuurtjie ontspan, en naweke die plaaslike sjebien besoek. Verraad en bedrog word egter nie geduld nie en sal wraaksugtig en wreed gestraf word.
Die spelers is
Chris Majiedt (SLANG), Charlton George (KLONKIES), Marlo Minnaar (OUGAT), Keenan Herman (HAROEN), Royston Stoffels (BALLIE) en André Samuels in die kameë van die koperdief.
Van die regisseur – Eben Cruywagen
“Hoorspelregisseurs is van die mees bevoorregte mense. Nie alleen is die moontlikhede van wêrelde en ruimtes wat geskep kan word oneindig nie, daar is ook geen beletsel ten opsigte van duur stelle, internasionale grense of gevaarsones nie. Dit maak dus hoegenaamd nie saak of ’n drama op Mars of in die DRK afspeel nie. Die enigste beperking is die kreatiwiteit van die skrywer, regisseur en produksieregisseur.”
Eben vertel verder dat “weinig skrywers egter akteurs is, en andersom, en wanneer die skrywer van ’n bekroonde inskrywing ’n gesoute akteur is, is dit ’n dubbele bonus! Toe Chris Majiedt in 2013 vir die eerste keer sy hand aan ’n radiodrama gewaag het en beloon is met ’n tweede plek in die RSG Radiodramaskryfkompetisie vir Slang in die gras, was hy dus ’n logiese keuse in die rolverdeling. En wie verstaan ’n komplekse sentrale karakter beter as die skrywer self?”
Die RSG Radiodramaskryfkompetisie bied regisseurs nog die verdere geleentheid om jaarliks met nuwe materiaal en skrywers te doen te kry. Vir regisseurs wat bevoorreg is om ook as mentors vir die kompetisie op te tree, is dit ’n bykomende bonus wanneer so ’n teks boonop met ’n prys beloon word.
Luister Radioteater om 8 uur op RSG of rsg.co.za, die RSG APP en beskikbaar as potgooi en op Spotify na afloop van die uitsending.
Luister weer na Groete van Tant Martjie deur Paula Hartzenberg. Dis ‘n menslike drama met ‘n sterk spanningslyn.
Die storie, karakters en spelers Martjie en Bruwer Groenewald, vertolk deur Rika Sennett en Anton Dekker, het nie ‘n maklike lewe agter die rug nie. Daar is ‘n leemte in Martjie se bestaan wat sy hoop om uiteindelik te kan vul. Maar sy weet dit gaan nie maklik wees nie. Bruwer, haar man, staan haar by. Hy doen alles in sy vermoë om die hartseer wat sy nog altyd in haar ronddra uiteindelik te verlig.
Die stappe wat sy moet doen, sluit in om Thomas Smit, vertolk deur Sean Brebnor, om te haal om haar op hulle plaas te besoek – oënskynlik om geldelike hulp by haar te kry. Thomas het ‘n bevoorregte lewe gely. Hy is geheg aan sy ma, Franzé, vertolk deur Bertha le Roux-Wahl, maar sekere feite, wat na sy pa se dood aan die lig kom, verwar hom. Na sy besoek aan Martjie kry hy uiteindelik antwoorde.
Ander spelers is Louise Eksteen as Kadija, ‘n eertydse verpleegster wat Martjie jare gelede bygestaan het, asook nuweling Mada Oosthuizen as Lianie Landman – die jong vrou wat deels verantwoordelik is vir Thomas se geldelike probleme.
Die skrywer is Paula Hartzenberg en die drama is in Johannesburg opgevoer deur Mari Snyman.
Luister weer as potgooi en op Spotify na afloop van die uitsending.
Agter vlnr: Louise Eksteen, Anton Dekker, Rika Sennet, Frik Wallis (klank) en Sean Bebnor. Voor: Mada Oostuizen, Dipalesa Motau (klank) en Bertha le Roux-Wahl.
ʼn Onverwagse Krismisboks uit die pen van Christo Davids op Donderdag 7 Mei is ‘n roerende werk uit die argief en is in 2013 as deel van RSG se eerste kunstefees uitgesaai.
Margot Luyt het die regie behartig met Ivan Abrahams, Theresa Cloete, Dean Balie, Kim Cloete, Hein Poole, Sue Pyler-Slabbert, Johan Stassen en Deirdre Wolhuter in die rolverdeling.
‘n Onverwagse Krismisboks is beskikbaar as potgooi en op Spotify na afloop van die uitsending.
Christo Davids
Die storie
Margie, ’n toegewyde verpleegster by Tygerberg Hospital, werk lang en uitputtende skofte om haar twee kinders, Zelda en Zak, te onderhou nadat haar man Henry haar jare tevore verlaat het.
Zelda raak swanger ná ’n verhouding met George – ’n getroude man – wat druk op haar plaas.
Zak word gearresteer vir die aanranding van ’n vrou aan wie hy dwelms verkoop het.
In ’n ironiese wending word Henry, Zak se afwesige pa, sy prokureur wat self intussen deur sy tweede huwelik is en nou alleen is.
Hierdie omstandighede dwing die gesin om weer bymekaar te kom oor Kersfees, waar ou wonde, skuld en moontlike versoening na vore kom.
RSG se eerste radioteaterseisoen van 2026 is ‘n fees van eietydse en klassieke werk. Luisteraars word egter vanuit die staanspoor bederf met die wendramas van 2025 se RSG en ATKV radiodramaskryfkompetisie.
21 Mei: ‘n Slang in die gras (Argief) ‘n Slang in die gras op Donderdag 21 Mei deur Chris Majiedt was die tweede prys wenner van die 2013 RSG radiodramaskryfkompetisie.
Slang en sy groepie helpers versamel kosbaarhede, veral koper en aluminium, by die asgate om te verkoop. Hulle was almal in die tronk, en lede van die tronkbendes. En daar is min genade vir dislojaliteit.
Met Chris Majiedt, Charlton George, Marlo Minnaar, Keenan Herman, Royston Stoffels en André Samuels in die rolverdeling en Eben Cruywagen as regisseur.
28 Mei: Hartsake Joe Kleinhans vertel in Hartsake op Donderdag 28 Mei die storie van die akteur Joshua (Robbie Wessels) wat op die kruin van sy sepieloopbaan staan, maar ‘n onverwagse wending ondergaan tydens ‘n roetine-ondersoek.
Luan Jacobs het die regie behartig met Renske Jacobs, Kaz McFadden, Imarie Oberholzer, Antowan Nothling en Elzabé Zietsman in die rolverdeling.
4 Junie: 1,2,3 Blok myself Die aktrise-sangeres Karen Wessels is terug met haar drama 1,2,3 Blok myself op Donderdag 4 Junie.
Soos Monika (Natasja Jacobs) se werklikheid begin verbrokkel, word die luisteraar saamgeneem in ’n spanningsvolle onthulling van verborge geheime, skuldgevoel, en ’n verlede wat weier om begrawe te bly. Die rolverdeling word verder gevul deur Pierre Breytenbach, Amanda Strydom, Zane Meas, Pietie Beyers en Jakkie Groenewald.
11 Junie: Amadeus Sir Peter Shaffer sou in Junie vanjaar ‘n 100 jaar oud geword het. Om dié Britse ikoon en skrywer te vier, saai RSG die treffer, Amadeus, op Donderdag 11 Junie om 20:00 uit. Die teks is spesiaal vir die radio deur Nerina Ferreira vertaal en verwerk. Wyle Margot Luyt het die regie meesterlik behartig.
Uit die vele samesweringsteorieë oor Wolfgang Amadeus Mozart se dood is die weergawe van die komponis, Antonio Salieri, seker die bekendste. André Rossouw vertolk Salieri en die gevierde verhoogregisseur Marthinus Basson Mozart. Ander spelers is Shirley Ellis, Dawid Minnaar, Herman Pretorius, Paul Malherbe, Pieter Cilliers, Dawie Ackerman, Johan Rademan, Jan Lombard en Pieter Bredenkamp.
18 Junie: Potplant Kabaret in radioteater is nie iets wat dikwels gehoor word nie. Karli Heine het haar kunstefeestreffer, Potplant, vir die radio verwerk met oorspronklike musiek en toonsettings deur Grethe van der Merwe.
Op Donderdag 18 Junie debuteer die radio-akteur en sanger Dean Balie as regisseur met Eben Genis, Marion Holm, Ester von Waltsleben, Lochner de Kock, Karli Heine en Joanie Combrink in die rolverdeling. Kantoorpolitiek word gesien deur die oog van die potplante wat soms as alledaags beskou word. Maar wat is aan die gang as niemand kyk nie?
25 Junie: Liesbet Die seisoen word meesterlik op Donderdag 25 Junie afgesluit met ‘n nuwe radiodrama deur Leon van Nierop.
Liesbet is ‘n verhaal wat so sterk met Van Nierop geresoneer het dat hy eenvoudig die storie moes neerpen en opneem. Waar daar eers florerende, mooi stasies was, is daar deesdae maar min van oor. Maar wanneer ‘n nuwe toeristeroete uitgelê word, word die gesteelde spore vervang en word ‘n stoker opdrag gegee om ‘n legendariese ou lokomotief te restoureer. Terwyl hy dit doen, klim ‘n seun met ernstige leer- en leesprobleme (disleksie) van ‘n bus af. Hy kan saam met die stoker na sy eindbestemming in die lokomotief ry indien hy instem om die reuse-staalgedierte te was en te poleer. Gedurende hierdie reis het die twee ‘n onuitwisbare invloed op mekaar. Met Deon Lotz, Rico Immelman en Ria Smit.
Reeds uitgesaai
2 April: Meeu-rus deur Jana Nortier Die seisoen begin op Donderdag 2 April met die derde plek wenner, Meeu-rus, deur Jana Nortier. Christelle Webb-Joubert is die regisseur en Juanita de Villiers haar regterhand saam met die spelers Ryno Hattingh, Kim Cloete, De Waal Stemmet, Stephanie Baartman, Christine Voorendyk en Francois van Rensburg in die rolverdeling.
Meeu-rus is die verhaal van Stefan wat die familieplaas erf na sy pa se afsterwe. Elna en Hein, Dawid se kinders uit sy huwelik, betwis die testament en roep die hulp van Landi Arendse in. Landi het egter ‘n geheim van haar eie.
3 April: Die Herbergier deur Esta Steyn Op Goeie Vrydag (3 April) om 14:00 kan die gewilde skrywer Esta Steyn se Die Herbergier gehoor word. Dié bekroonde radiodrama handel oor die herbergier van Betlehem wat nou in Jerusalem by sy oudste seun woon toe Jesus 33 jaar later gekruisig word. Hulle word onder andere gekonfronteer met die onvermydelike van sy teregstelling. Die regisseur is Helena Hugo met Cobus Visser, Gigi Strydom, Martin Jansen, Bertha le Roux-Wahl, Eswé Bruwer en Anrich Herbst in die rolverdeling.
9 April: Gebakte pere deur Karen du Toit Marnus se eerste dag op universiteit kon nie met ’n groter skok begin het nie. Emma daag ná maande se stilswye skielik by die woonstelblok waarin hy sal tuisgaan op met die nuus dat hy die pa van ’n kind is. Sy laat die baba in die drie woonstelmaats se sorg, en sê sy het die fopspeen in haar motor vergeet. Sy kies die hasepad.
Karen du Toit is as gesamentlike naaswenner aangewys in RSG se 2025 Radiodramaskryfkompetisie in samewerking met ATKV. Die regisseur is Lelia Etsebeth, met Christopher van der Westhuizen, Dihan Keun, JJ Roberts, Izel Bezuidenhoud, Marina Coetzee en Gretha Brazelle in die rolverdeling.
16 April: Suikerbek Suikerbek deur Ingrid Penzhorn wat ook met die tweede prys bekroon is, is te hore op Donderdag 16 April met Johan Rademan as regisseur.
Carolien is ’n mediese student wat finansieel noustrop trek. ’n Medestudent, Saskia, vertel haar hoe sy maklik geld kan verdien deur ’n gesellin vir ’n welgestelde man te wees. Die rolverdeling bestaan uit Minke Marais, Conradie van Heerden, Karli Heine, Deon Lotz en André Weidemann.
23 April: Kalahari sterre Die algehele wendrama van verlede jaar, Kalahari sterre volg op Donderdag 23 April en is uit die pen van Adam Willemse.
Boeta (Dean Balie), Benji (André Samuels), Lulu (Wessel Pretorius) en Paul (Eben Genis) bied ʼn vertoning aan wat dit waag om die ander sy van menswees uit te beeld vir ʼn konserwatiewe, plattelandse gehoor. Kommer, sukses, vergifnis en herstel van verhoudings is waarmee die karakters gekonfronteer word in dié radiostorie. Die ander spelers is Susanne Beyers en Royston Stoffels. Joanie Combrink het die regie behartig.
30 April: Bloed van my Die wenner van die prys vir Jong Skrywer (jonger as 30 jaar) is JJ Roberts met Bloed van my, op Donderdag 30 April.
Broederlike liefde bots met ‘n noodlottige verlies en Simeon en Meyer moet hulle pad deur dié uitdaging vind. Casper Lourens, Wiandré du Plessis, Claudia Jones, Rico Immelman en Blyde Schoeman is die spelers onder spelleiding van Eddie de Jager.
7 Mei: ‘n Onverwagse Krismisboks (Argief) ‘n Onverwagse Krismisboks uit die pen van Christo Davids op Donderdag 7 Mei is ‘n roerende werk uit die argief en is in 2013 as deel van RSG se eerste kunstefees uitgesaai.
Margie is ‘n verpleegster by die Tygerberg-hospitaal, waar sy baie keer dubbelskof werk om te probeer voorsien vir haar twee kinders, Zelda en Zak. Margot Luyt het die regie behartig met Ivan Abrahams, Theresa Cloete, Dean Balie, Kim Cloete, Hein Poole, Sue Pyler-Slabbert, Johan Stassen en Deirdre Wolhuter in die rolverdeling.
14 Mei: Tant Martjie Op Donderdag 14 Mei kan daar ingeskakel word vir Groete van Tant Martjie deur Paula Hartzenberg met Sean Brebnor, Rika Sennet, Anton Dekker, Bertha le Roux-Wahl, Mada Oosthuizen en Louise Eksteen in die rolverdeling.
‘n Vreemdeling klop aan Thomas se woonsteldeur en stel homself bekend as Bruwer Groenewald. Voordat Thomas dit regkry om die deur in sy gesig toe te druk, speel Bruwer nog sy troefkaart: “Jou tant Martjie stuur groete”. Mari Snyman het die regie behartig.
Die prys vir Jong Skrywer (jonger as 30 jaar) van die 2025 RSG Radiodramaskryfkompetisie in samewerking met die ATKV is JJ Roberts met Bloed van my, wat op Donderdag 30 April uitsaai.
Broederlike liefde bots met ‘n noodlottige verlies en Simeon en Meyer moet hulle pad deur dié uitdaging vind. Dis ‘n storie met ‘n diep persoonlike oortuiging. Die skrywer het deur ‘n soortgelyke ervaring gegaan.
Casper Lourens, Wiandré du Plessis, Claudia Jones, Rico Immelman en Blyde Schoeman is die spelers onder spelleiding van Eddie de Jager.
Luister na Bloed van my, deur JJ Roberts, Donderdagaand 30 April in Radioteater om 8 uur op RSG of rsg.co.za en beskikbaar as potgooi en op Spotify na afloop van die uitsending.
Die storie
Meyer is Simeon se ouer broer. 18 Maande tevore is hul ouers in ’n motorongeluk dood en Meyer moes sy studies staak en as Simeon se voog optree terwyl hy sy laaste twee jaar op skool voltooi.
Simeon worstel met ’n skuldgevoel omdat hy ná ’n partytjie gearresteer is en sy ouers hom by die polisiestasie moes gaan haal, maar onderweg daarheen het hulle verongeluk. Dit lei tot allerlei probleme tussen die twee broers, totdat hulle openlik oor hulle ouers se dood praat en hulle verhouding herstel word.
Oor die skrywer – JJ Roberts
Roberts is gebore en getoë in Upington. Hy voltooi ‘n graad in onderwys by die NWU Potchefstroom en verhuis na Pretoria in 2021. Daar voltooi hy ‘n kursus in drama en word ‘n voltydse vryskut kunstenaar in die vermaaklikheidsbedryf.
JJ Roberts
JJ was al te sien in verskeie musiekblyspele en te hore in radiodramas, vervolgverhale asook die vervaardiger en aanbieder van Kortom op RSG. As skrywer het ‘n paar teaterstukke en kortverhale al uit sy pen gevloei.
“Ietsie interessant van my is ek is tans besig om ‘n persoonlike argief op te bou van teaterstukke, veral Afrikaanse teaterstukke. Ek vind hulle is uniek en die moeite werd om te bewaar. Ek bou ook ‘n persoonlike argief op bestaande uit potgooie van beide Afrikaanse en Engelse radiodrama ’s. Dit is vir my ‘n besonderse interessante medium wat grensverskuiwend is met klank en die verbeeldingswêreld wat saam met dit kom,” vertel JJ.
Nota van die regisseur
Eddie de Jager het die drama opgeneem en het so getrou as moontlik die teks benader, veral met die gebruik van musiek en byklanke wat die leefwêreld en emosies van die storie vasvat.
“Die drama volg ‘n duidelik struktuur wat die reis van elke karakter tot ‘n gevolgtrekking bring wat die luisteraar in staat sal stel om self afleidings te maak. Die universele temas soos verlies, volwassenheid en liefde laat jou met genoeg stof tot nadenke verweef in ‘n vermaaklike en opvoedkundige storie om dit ‘n wenteks te maak.”
Die spelers
Casper Lourens, Wiandré du Plessis, Claudia Jones, Rico Immelman en Blyde Schoeman is die spelers onder spelleiding van Eddie de Jager.
Die drama, Kalahari sterre, deur Adam Willemse, is as die algehele wenner aangewys in die 2025 RSG Radiodramaskryfkompetisie in samewerking met die ATKV.
Dit bied baie stof tot nadenke. Dit is ‘n aangrypende drama vol humor en patos, met herkenbare karakters wat baie deernis wek.
Luister Donderdagaand 23 April na die wendrama in Radioteater om 8 uur op RSG of rsg.co.za en beskikbaar as potgooi en op Spotify na afloop van die uitsending.
Die talentvolle rolverdeling sluit in spelers soos Dean Balie en Andre Samuels, Wessel Pretorius, Eben Genis, Susanne Beyers en Royston Stoffels.
Joanie Combrink het die regie behartig.
Adam Willemse het vir die eerste keer ingeskryf vir die Radiodramaskryfkompetisie en as algehele wenner uit die stryd getree in 2025. Hy is ‘n voltydse psigometris en ‘n deeltydse opvoeder in sielkunde.
Die storie
Kalahari sterre is ‘n aangrypende drama vol humor en patos, met herkenbare karakters wat baie deernis wek.
Drie vriende en hulle jong bestuurder vertrek op ‘n reis na die dorpie Askam. Dit blyk nie net ‘n gewone reis te wees nie, maar ook ‘n ontdekkingsreis, ‘n reis na self, na identiteit en aanvaarding.
Askam
Boeta, Benji, Lulu en Paul bied ʼn vertoning aan wat dit waag om die ander sy van menswees uit te beeld vir ʼn konserwatiewe, landelike gehoor. Ten spyte van veral Boeta en Paul se kommer, is die vertoning ʼn reuse sukses en is daar ook sprake van vergifnis en herstel van ʼn onseker verhouding tussen Boeta en sy weerbarstige pa, Ruben.
Van links na regs agter: Eben Genis, Dean Balie en André Samuels. Middel vlnr: Joanie Combrink, Susanne Beyers en Royston Stoffels. Voor: Wessel Pretorius
Oor die skrywer – Adam Willemse
Adam Willemse is ‘n skrywer, oud hoërskoolonderwyser, ‘n voltydse psigometris en ‘n deeltydse opvoeder in sielkunde. Voorheen van Pretoria, is hy al amper ‘n dekade lank woonagtig in Vishoek, Kaapstad.
Adam Willemse
Sy eerste skryfwerk is as tiener gepubliseer. Daar is ook van sy skryfwerk te vinde in die Litnet argiewe. Hy hou daarvan om stories te vertel, en skryf minder as wat hy graag sou wou.
Wanneer hy nie skryf nie, waag hy sy hand aan beeldende kuns of versorg hy sy groeiende versameling orgideë. Saans kan jy hom vind op sy rusbank met ‘n Skandi-noir reeks op die TV besig om te hekel en ‘n worshond of twee teenaan hom opgekrul.
Die gesamentlike naaswenner van die 2025 RSG-radiodramaskryfkompetisie in samewerking met die ATKV, Suikerbek deur Ingrid Penzhorn is op ʼn manier ʼn versuikerde weergawe van groot uitdagings en dilemmas vir jongmense.
Penzhorn skep ʼn studente-omgewing waar ‘n teksboodskap lei tot ‘n wedersydse ooreenkoms tussen ʼn mediese student en ʼn sakeman wat ‘n finansiële voordeel inhou. Soos die drama ontvou is dit egter nie die sakeman nie, maar ʼn professor in ‘n magtige posisie, wat onregmatig sy gesagsposisie misbruik. ‘n Storie so oud soos die berge, maar in ʼn moderne kampusstyl aangebied.
Spelers soos Deon Lotz, Minke Marais, Conradie van Heerden, Karli Heine en André Weideman blink uit in Suikerbek deur Ingrid Penzhorn onder regie van Johan Rademan op RSG, Donderdagaand 16 April om 20h00.
Luister op RSG of rsg.co.za en beskikbaar as potgooi en op Spotify na afloop van die uitsending
Die storie
Carolien is ’n mediese student wat finansieel noustrop trek. ’n Medestudent, Saskia, vertel haar hoe sy maklik geld kan verdien deur ’n gesellin vir ’n welgestelde man te wees.
Aanvanklik is sy baie bang, maar heel gou geniet sy Chris Claassen se geselskap en wat sy saam met hom beleef. Totdat sy ’n besope prof. Albertyn op ’n partytjie raakloop en hy hom onbetaamlik gedra.
Nadat sy afgestudeer is, sien sy en Josua in die koerant dat die professor van sy amp onthef is en dat die Gesondheidsberoepsraad begin ondersoek instel het na klagtes van vroulike pasiënte van dekades gelede.
Toe Josua vra of sy Chris Claassen weer sal wil sien, sê sy: “Miskien. Maar vir nou is jy al man wat ek naby my wil hê.”
Agter:Johan Rademan(regie), Andre Weideman(Chris Claassen), Deon Lotz(Prof Albertyn) Voor: Minke Marais (Carolien Brits), Karli Heine (Saskia de Bruin), Conradie van Heerden(Josua Visser)
Oor die skrywer – Ingrid Penzhorn
Ingrid is ‘n patoloog in Kaapstad woon. Sy het al drie keer vantevore aan die RSG-radiodramaskryfkompetisie deelgeneem. Sy was ’n finalis in 2010 met Snykuns, Jong Skrywer wenner (skrywer jonger as 30) in 2012 met Vlug, en algehele wenner in 2014 met Ontnugter. Sy het ook onlangs as speler betrokke geraak by die Kaapstadse amateurtoneelwêreld.
Regisseursvisie
Johan Rademan beskou die inhoud van mede-2de pryswenner van die RSG-Radiodramaskryfkompetisie, Suikerbek deur Ingrid Penzhorn as ’n slim versuikerde weergawe van menslike uitgelewerdheid en uitbuiting met verskeie rooi ligte wat flikker tydens die drama.
Conradie van Heerden(Josua Visser), Johan Rademan en Minke Marais(Carolien Brits),
Agter:Karli Heine (Saskia de Bruin)en Minke Marais( Carolien Brits) Voor: Conradie van Heerden (Josua Visser) en Deon Lotz (Prof Albertyn)
RSG se eerste radioteaterseisoen van 2026 is ‘n fees van eietydse en klassieke werk en sluit in ‘n sonderlinge radioverwerking van sir Peter Shaffer se veelbekroonde Amadeus met André Rossouw en Marthinus Basson in die hoofrolle.
Luisteraars word egter vanuit die staanspoor bederf met die wendramas van 2025 se RSG en ATKV radiodramaskryfkompetisie.
9 April: Gebakte pere deur Karin du Toit Dis die gesamentlike tweede plek wenner in die 2025 radiodramaskryfkompetisie.
Marnus se eerste dag op universiteit kon nie met ’n groter skok begin het nie. Emma daag ná maande se stilswye skielik by die woonstelblok, waarin hy sal tuisgaan, op met die nuus dat hy die pa van ’n kind is.
Sy laat die baba in die drie woonstelmaats se sorg, en sê sy het die fopspeen in haar motor vergeet. Sy kies die hasepad. Vyf dae lank het die drie probeer huishou met klein Peertjie, en uiteindelik bel Adriaan sy tante Magda om te vertel van Marnus se gebakte pere.
Magda kom haal die kind, en vier jaar later by die gradeplegtigheid, is dit duidelik dat Marnus en Emma versoen is, en met Magda se hulp, die trotse ouers van die vierjarige Nathan is.
Karen du Toit is as gesamentlike naaswenner aangewys in RSG se 2025 Radiodramaskryfkompetisie in samewerking met ATKV.
Die regisseur is Lelia Etsebeth, met Christopher van der Westhuizen, Dihan Keun, JJ Roberts, Izel Bezuidenhoud, Marina Coetzee en Gretha Brazelle in die rolverdeling.
Luister hoe Dihan Keun, Christopher van der Westhuizen, JJ Roberts, Izel Bezuidenhout, Marina Coetzee en Gretha Brazelle die storie vertel met regie deur Lelia Etsebeth.
Die seisoen begin op Donderdag 2 April met die derde plek wenner in die RSG Radiodramaskryfkompetisie in samewerking met die ATKV, Meeu-rus, deur Jana Nortier.
Stefan, Dawid de Kock se buite-egtelike kind, erf die familieplaas na sy afsterwe. Elna en Hein, Dawid se kinders uit sy huwelik, betwis die testament en roep die hulp van Landi Arendse in. Landi het egter ‘n geheim van haar eie.
Christelle Webb-Joubert is die regisseur en Juanita de Villiers haar regterhand saam met die spelers Ryno Hattingh, Kim Cloete, De Waal Stemmet, Stephanie Baartman, Christine Voorendyk en Francois van Rensburg in die rolverdeling.
Die skrywer van Meeu-rus, Jana Nortier het vir lank die rol van Sussie vertolk in die sepie, Villa Rosa. Jana het veral bekendheid verwerf met die Wimpy advertensie, waarin haar karakter gesê het: “Ag Henry, I love it when you talk foreign”
Die bekende akteur en hartebreker van jare gelede, Ryno Hattingh, is vir die eerste keer in jare weer te hoor in radioteater.
Francois van Rensburg, Ryno Hattingh, JD Labuschagne, Juanita de Villiers, Christine Voorendyk, voor Dipalesa Motau, De Waal Stemmet, Kim Cloete, Stephanie Baartman, en Christelle Webb-Joubert
Dis die eerste keer, sover ons weet, dat daar twee regisseurs aan een drama gewerk het. Christelle Webb-Joubert en Juanita de Villiers is ’n gedugte span. “Weens my swak sig is Juanita nie net my ekstra paar oë nie, maar sy het regtig ’n wonderlike gawe as dit by redigering kom. Ons vul mekaar aan en het oor die algemeen dieselfde visie.” Verduidelik Christelle. “Ons poog om die drama so eerlik en eg as moontlik te laat klink. Gelukkig is daar niks fout met Christelle se gehoor nie” lag Juanita by.
SChristine Voorendyk, Francois van Rensburg, Stephanie Baartman en De Waal Stemmet
Dawid de Kock se dood het heelwat vrae laat ontstaan in die gemoedere van sy seun, Hein, sy dogter, Elna en sy buite-egtelike seun, Stefan, aan wie die familieplaas, Meeu-rus, bemaak is. Wanneer die boedelbeampte, Landi Arendse, haar verskyning maak, raak die geheime al hoe meer tergend en die vraagtekens al hoe groter. Simon Moses, Ou Loes se man, het 30 jaar tevore verdwyn, en Landi erken dat sy Simon se dogter is. Sy glo haar pa is vermoor. Op ’n kasset word skok onthullings ontdek wat alle onsekerhede uit die weg ruim.
Juanita de Villiers, Ryno Hattingh, en Christelle Webb-Joubert
Christelle Webb-Joubert is die regisseur en is haar Juanita de Villiers haar regterhand. Die bekende akteur en hartebreker van jare gelede, Ryno Hattingh, is vir die eerste keer in jare weer te hoor in radioteater. Kim Cloete keer ook terug na radioteater saam met De Waal Stemmet, Stephanie Baartman, Christine Voorendyk en Francois van Rensburg in die rolverdeling.
