‘n Verandering in landbouchemie is noodsaaklik. SB Coetzee van AECI Plant Health verwys na ‘n sagter benadering wat deesdae vereis word, en hy verduidelik wat dit behels. Ons vind meer uit oor ‘n unieke gebruik van droë ys in landbou. Johan van den Berg is op sy pos met weernuus, en Chris Derksen gesels oor vleispryse.

Ons fokus op die belangrike rol wat grootouers speel in die grootmaak van kinders. En, van watter ouderdom af mag kleintjies by oupa en ouma oornag? Sielkundige Fiona Doman-Olivier het die antwoorde.

AS DIE HADIDA ROEP deur Charles J. Fourie
Regie: Denver Vraagom
EPISODE 42: Wilma vertel vir Ester van dominee en Ryno wat nou ‘n aardbewing nooddiens-stasie in die kerksaal oprig nadat hy voor die kerkraad verskyn het. Hulle besluit om te gaan kyk wat daar aangaan. Ronel vertel vir Ryno van die babapop wat Lionel vir Jolene gekoop het om haar moederskap mee te oefen.

Hazel Janse van Rensburg gesels met Christiaan Hougaard, hoof van die musiekdepartement by Muizenberg Junior Skool, oor die waarde van musiekopvoedkunde.

SHIRLEY SE SKULD deur Anene Loots
Regie: Joanie Combrink
In weerwil van die feit dat die bejaarde Rina in ‘n aftreeoord woon, wil sy steeds avonture aanpak en haar lewe geniet. Wanneer dit lyk of daar ‘n kans is dat sy, soos Shirley in die rolprent Shirley Valentine, op ‘n Griekse eiland kan gaan vakansie hou, is haar opgewondenheid groter as haar gesonde verstand. Onverwagse wendinge bring drama en konsternasie, met komiese gevolge. Die spelers is Susanne Beyers, Elsabe Daneel, Nic de Jager, Zenobia Kloppers, Dean Balie en Roeline Daneel. Anene Loots het in 2023 die merieteprys met hierdie drama gewen in die RSG Radiodramaskryfkompetisie in samewerking met die ATKV.

Luister na ‘n deel uit Mozart se Lodronische Nachtmuzik; ‘n mars van Nico Dostal; en ’n aria uit Mercadante se opera, DIE EED, gesing deur Jose Carerras.